Termiz davlat universiteti rektori Avazjon Marahimov shaharda ijarada istiqomat qiluvchi talabalarning yashash joylariga borib, ularning holidan xabar olmoqda, deb xabar beradi universitet matbuot xizmati.

E’lon qilingan suratlarda Avazjon Marahimov ijarada yashovchi talabalar bilan suhbatlashib, hatto bir dasturxon atrofida o‘tirganini ham ko‘rish mumkin.

“Xonadon egalari, ularning kasbi, talabalar uchun yaratilgan sharoitlar, texnik xavfsizlik kabi masalalar rektor tomonidan o‘rganilmoqda. Talabalar bilan suhbat qilinib, ularning qiziqishlari, taklif va mulohazalari tinglandi. Yashash sharoitlarini yaxshilash bo‘yicha mas‘ullarga ko‘rsatmalar berildi”, — deyiladi xabarda.

Avvalroq Toshkentning Yunusobod tumanida besh nafar talaba o‘lik holda topilgani, ulardan biri Inha universitetining 1-bosqich talabasi ekanligi to‘g‘risida xabar berilgan edi. Fojiadan so‘ng ijarada yashayotgan talabalarning sharoitlari o‘rganiladigan bo‘ldi.

Oliy Majlis Qonunchilik palatasida 2-mart kuni o‘tkazilgan “Hukumat soati”da oliy va o‘rta maxsus ta’lim vaziri Abduqodir Toshqulov talabalarning yotoqxonalarga bo‘lgan ehtiyoji haqida so‘z yuritib, hozirda respublikada mavjud 228 ta talabalar turar joyida 58 ming nafar talaba istiqomat qilayotganini ma’lum qilgandi.