Термиз давлат университети ректори Авазжон Мараҳимов шаҳарда ижарада истиқомат қилувчи талабаларнинг яшаш жойларига бориб, уларнинг ҳолидан хабар олмоқда, деб хабар беради университет матбуот хизмати.
Эълон қилинган суратларда Авазжон Мараҳимов ижарада яшовчи талабалар билан суҳбатлашиб, ҳатто бир дастурхон атрофида ўтирганини ҳам кўриш мумкин.
«Хонадон эгалари, уларнинг касби, талабалар учун яратилган шароитлар, техник хавфсизлик каби масалалар ректор томонидан ўрганилмоқда. Талабалар билан суҳбат қилиниб, уларнинг қизиқишлари, таклиф ва мулоҳазалари тингланди. Яшаш шароитларини яхшилаш бўйича масъулларга кўрсатмалар берилди», — дейилади хабарда.
Аввалроқ Тошкентнинг Юнусобод туманида беш нафар талаба ўлик ҳолда топилгани, улардан бири Инҳа университетининг 1-босқич талабаси эканлиги тўғрисида хабар берилган эди. Фожиадан сўнг ижарада яшаётган талабаларнинг шароитлари ўрганиладиган бўлди.
Олий Мажлис Қонунчилик палатасида 2 март куни ўтказилган «Ҳукумат соати»да олий ва ўрта махсус таълим вазири Абдуқодир Тошқулов талабаларнинг ётоқхоналарга бўлган эҳтиёжи ҳақида сўз юритиб, ҳозирда республикада мавжуд 228 та талабалар турар жойида 58 минг нафар талаба истиқомат қилаётганини маълум қилганди.
Изоҳ (0)