Фарғона вилоятида божхоначилар 300 миллион сўмлик уяли алоқа воситаларининг ноқонуний айланмасини фош этди, деб хабар берди «Дарё» мухбири.
Маълум қилинишича, Фарғона вилояти божхона бошқармаси Контрабандага қарши курашиш ва божхона аудити бўлими ходимлари томонидан навбатдаги тезкор тадбир ўтказилган.
Тадбир давомида Фарғона туманида ҳаракатланаётган фуқаро Ё.Д. бошқарувидаги Captiva олдиндан кузатувга олинган. Ҳайдовчи кузатув остидалигини сезиб қолиб автомашина салонидаги 7 дона қутини йўл четидаги ариқ ичига ташлаб юборган ва ҳаракатланишда давом этган. Тадбир иштирокчилари томонидан ҳайдовчи тўхтатилиб, ариқ ичидаги қутилар белгиланган тартибда кўздан кечирилган. Мазкур қутиларда қиймати 300 миллион сўмлик 6 турдаги 158 дона уяли алоқа воситалари борлиги аниқланган.
Ҳозирда ушбу ҳолат юзасидан божхона органлари томонидан терговга қадар текширув ҳаракатлари олиб борилмоқда.
Изоҳ (0)