Олий Мажлис Қонунчилик палатаси депутати Расул Кушербаев ОТМга кира олмаган ўқувчилари сабабли мактаб директорларининг ишдан олинишига ўз муносабатини билдириб, боланинг ўқишга кириши мактабнинг бўйнида эмас, деб айтганди. Бунга жавобан халқ таълими вазири Шерзод Шерматов «йиллар давомида мактабда малакали ўқитувчини ишга олиш ва рағбатлантириш ўрнига таниш-билишчилик қилиши натижасида юзлаб битирувчиларидан биронтаси ҳам олий таълимга кирмаган мактаб директори ўз жойини натижага ишлайдиган, янги ғоялари бор номзодлар учун бўшатиши керакмасми?», деб жавоб қайтарди.
«Ушбу депутатимиз таклифига кўра, йиллар давомида мактабни ўзининг шахсий мулкидек қилиб олиб, малакали ўқитувчини ишга олиш ва рағбатлантириш ўрнига таниш-билишчилик қилиши натижасида юзлаб битирувчиларидан биронтаси ҳам олий таълимга кирмаган мактаб директорига чора кўра олмасак ёки чора кўрсак-да, ушбу депутатимиз таклифига кўра, улар судга бориб ютиб чиқиб, ўз ишига қайта тикланса, ундай директорлардан мамлакатимиз келажаги учун нима наф? Нима сабабдан, улар шунча битирувчисининг келажагига бефарқ бўлгани етмагандек, биз ҳам бунга бефарқ қараб туришимиз керак?
Лекин бу дегани битирувчиларининг 100 фоизи ёки аксарияти ОТМга кириши шарт дегани эмас, бундай талаб умуман қўйилмаган вазирлик томонидан», — деган халқ таълими вазири.
Унинг айтишича, Янгийўл туманидаги 1968 йилда қурилган, жуда таъмирталаб 45-мактабда ўқувчилари сони қувватидан икки баробар кўп бўлишига қарамай, туманда айнан шу мактаб ОТМга кириш бўйича энг яхши натижага эга. Бунга директор ташаббускорлиги ва яхши жамоани шакллантира оладиган раҳбар эканлиги эвазига эришилган.
Аксинча, биноси бу мактабникидан анча яхши бўлган ҳамда ўқувчилари сонининг мактаб қувватига нисбати камроқ бўлган қатор бошқа мактабларга кирганида директори ишни тўғри ташкил қилмагани учун улардаги жамоа ҳам ўзаро ҳамжиҳатмаслигига ва натижа ҳам пастлигига гувоҳ бўлган.
Вазирнинг таъкидлашича, ташқи факторлар бир хил бўлса-да (дастур, китоблар, ажратилаётган маблағ ва ҳ.к.), мактабдаги муҳит ва натижа мактаб директорига кўп жиҳатдан боғлиқлигини айнан шу мисолларда ҳам кўрса бўлади.
«Популизм муҳимроқми ёки фарзандларимизнинг келажакдаги муваффақияти учун директорларни ҳаракатга ундашми? Қадриятларимиз ва танловимиз икки хил экан.
Бу депутатимизнинг интернетда анчагина машҳурлигини инобатга олиб, айтаётган гаплари қандай оқибатга олиб келишига яхшироқ эътибор қарацалар тўғри бўлар эди», — деган Шерзод Шерматов.
Расул Кушербаев бунга жавобан олий таълим муассасасига битирувчилари кира олмаганлиги учун мактаб раҳбарларининг ишдан бўшатилишини қонунлар, шу жумладан, Меҳнат кодекси талабларига тўғри келмаслигини, бу нотўғри стратегия экани ва бу сабаб билан ишдан кетганлар бўлса, суд орқали муаммони ҳал қилиши мумкинлигини айтиб ўтди.
«Мен қонун устувор бўлишини истайман, холос, ўлай агар, бошқа мақсадим йўқ. Тўғриси, бу сабаб билан ишдан кетган бирорта мактаб директориниям танимайман.
Бироқ ҳурматли вазиримиз мени бунинг учун популизм ва қатор ва ҳоказо масалаларда айблабдилар. Агар демократик давлатлар қатори қонун устуворлигини таъминлаш ва муаммони суд орқали ҳал қилиш популизм бўлса, унда мен эмас, аввало, қонунлар ва Меҳнат кодекси бош популист бўлиб қолмайдими? Мен ‘тут причем’ агар қонунлар шундай ва камига суд деган ҳокимиятимиз бўлса», — дейди депутат.
Шу билан бирга, хато ўйлаётган ва фикрлаётган бўлса, вазир ва бутун вазирлик тизимидан, агар ишчанлик обрўсига путур етиб қолган бўлса, минглаб ўқитувчилардан узр сўрашини айтган.
«Бироқ барибир таълимми, соғлиқни сақлашми, ҳуқуқни муҳофаза қилишми, қўйингки, барча соҳада, аввало, қонунларга сўзсиз риоя қилиш, инсон ҳуқуқларини таъминлашни бош мақсадга айлантиришга амалда тўлиқ эришмас эканмиз, биз яна кўп йиллар орқада қолишимиз мумкин, деган фикримдан қайтмайман», — деб таъкидлаган Кушербаев.
Эслатиб ўтамиз, 2020 йил 14 ноябрь куни Қарши шаҳрида халқ таълими вазири Шерзод Шерматов раҳбарлигидаги йиғилишда 20 нафар мактаб директори бирорта битирувчиларининг ОТМларга кирмаганлиги сабабли ўз вазифасидан озод этилган эди. Шу билан бирга, Навоий вилоятида таълим сифати паст бўлган 26 нафар мактаб директори, ҳамда 2 нафар халқ таълими бўлими мудири, 3 нафар халқ таълими бўлими мудири ўринбосари эгаллаб турган лавозимидан олинганди.
Изоҳ (0)