Qashqadaryodagi mavjud 1157 ta maktabdan 75 tasining bitiruvchilari OTMga kirolmagan. Bu haqda viloyat hokimi Zoir Mirzayev rahbarligida pandemiya sharoitida umumta’lim maktablarida o‘quv jarayonini tashkil etish va yuzaga kelayotgan muammolarni bartaraf etish masalalariga bag‘ishlangan yig‘ilishda ma’lum qilindi, deya xabar berdi “Daryo” muxbiri.

Foto: “Daryo”

Ma’lum qilinishicha, viloyat rahbari Zoir Mirzayev xalq ta’limi tizimidagi muammolarni tanqid qilib, bitiruvchilari o‘qishga kirolmagan maktablarning o‘ntasini sanab o‘tgan.

Viloyat xalq ta’limi boshqarmasi axborot xizmati rahbari Fayzulla Eshqulovning aniqlik kiritishicha, Chiroqchida 20 ta, Koson tumanida 5 ta, Dehqonobodda 16 ta, Muborakda 4 ta, Nishonda 3 ta, G‘uzorda 5 ta, Shahrisabz shahrida 1 ta, Shahrisabz tumanida esa 5 ta, Qamashida 3 ta, Mirishkorda 2 ta, Yakkabog‘ va Qarshi tumani 5 tadan, Kitobda esa 4 ta maktab bitiruvchilari OTMga kirolmagan.

“Bitiruvchilari o‘qishga kirolmagan 75 ta maktabga tuman, shahar xalq ta’limi bo‘limi mudirlari va o‘rinbosarlarini maktab direktori qilib tayinlasak nima deysizlar? Mudir va o‘rinbosarlari zo‘r bo‘lsa, o‘sha maktabni qoloqlikdan olib chiqsin. Mas’ul ham lavozimini bajaradi, ham maktabga rahbarlik qiladi. Qaysi tuman yoki shahar xalq ta’limi bo‘limi mudiri shunday tashabbus bilan chiqadi?”, — deya mas’ullarga yuzlangan viloyat hokimi.

Foto: “Daryo”

Hokim Zoir Mirzayev xalq ta’limi boshqarmasi boshlig‘i o‘rinbosarlariga shunday tashabbus bilan chiqqan mudir va ularning o‘rinbosarlari ro‘yxatini shakllantirib, bu haqda OAVda ma’lumot berilishi kerakligini ta’kidlagan.

“Muhtaram Prezidentimiz joylardagi xalq ta’limi mas’ullari viloyat hokimining ta’lim tizimi bo‘yicha o‘rinbosari degan talabni qo‘ydi. Demakki, bugundan boshlab men viloyat xalq ta’limi boshqarmasi boshlig‘i vazifasini ham bajaraman. Ta’lim tizimidagi muammolar va jarayonlar bilan endi shaxsan o‘zim shug‘ullanaman”, — dedi Zoir Mirzayev.

Foto: “Daryo”

Zoir Mirzayevning qo‘shimcha qilishicha, bundan keyin viloyat xalq ta’limi boshqarmasi boshlig‘i o‘rinbosarligiga, shuningdek tuman va shahar XTB mudirligiga nomzodlar tanlab olinadi va ular viloyat rahbari suhbatidan o‘tadi.

“Ishlayman, yangilik qilaman, degan tashabbuskorlarni rahbarlikka o‘tkazamiz. Bu haqdagi e’lonlar viloyat hokimligi va tuman, shahar hokimliklarining rasmiy saytlari va Telegram kanallarida e’lon qilinadi. Ishlash ishtiyoqi bo‘lgan tashabbuskorlarni kutib qolamiz”, — degan Zoir Mirzayev.