Ҳукумат қарорига кўра, Сардоба сув омборидаги дамба етказган зарарларни таъмирлаш ва қоплаш ишлари «ТўпалангсувГЭСқурилиш» МЧЖ ва «Ўзбекистон темир йўллари» томонидан амалга оширилмоқда. Бу ҳақда 1- март куни Қурилиш вазирлигида ўтказилган матбуот анжуманида маълум қилинди, дея хабар бермоқда «Дарё» мухбири.
«Вазирлар Маҳкамаси таклифи билан қарор ишлаб чиқилди. Унга кўра, дамба етказган зарарларни таъмирлаш ва қоплаш ишлари ‘ТўпалангсувГЭСқурилиш’ МЧЖ ва ‘Ўзбекистон темир йўллари’га юклатилган. Улар бу ишларни лойиҳа асосида ўз ҳисобидан амалга оширмоқда. Давлат бюджетидан бир сўм ҳам ишлатилаётгани йўқ.
Сув омборини қайта қуришга оид лойиҳаларимиз халқаро экспертизадан ўтказилганидан сўнг тендерга қўйилади. Тендер шаффофлик асосида ўтказилади ва унда ким ютиб чиқишини вақт кўрсатади. Олдиндан бир нарса дея олмаймиз. Қайта қуриш жараёни қачон бошланиши ҳам аниқ эмас. Чунки дамбани қайта тиклаш анча вақт олади, буёғига шошилиб бўлмайди», — деди қурилиш вазири Ботир Зокиров.
Бу борада сув хўжалиги вазири Шавкат Ҳамраев муносабат билдираркан, хусусан, шундай деди:
«Сув омборини қайта қуриш лойиҳаси якунига етказилгач шаффофлик асосида тендер ўтказилади. Унда ‘ТўпалангсувГЭСқурилиш’ МЧЖ қатнашадими, йўқми, билмаймиз. Тендер жараёни якунида қайси ташкилот қуриши маълум бўлади».
Мавзуга доир:
- Сардоба сув омбори Сув хўжалиги вазирлигига берилди. Вазирликка сув омборини хавфсиз эксплуатация қилиш юклатилди
- Сардоба сув омбори қайта қурилади. Бу бўйича ҳукумат қарори қабул қилинган
- «Техноген офат сабабларини ўрганиш учун россиялик мутахассислар жалб қилинган». Қурилиш вазири Сардоба сув омбори ҳақида
Изоҳ (0)