Oliy Majlis Qonunchilik palatasi deputati Rasul Kusherbayev OTMga kira olmagan o‘quvchilari sababli maktab direktorlarining ishdan olinishiga o‘z munosabatini bildirib, bolaning o‘qishga kirishi maktabning bo‘ynida emas, deb aytgandi. Bunga javoban xalq ta’limi vaziri Sherzod Shermatov “yillar davomida maktabda malakali o‘qituvchini ishga olish va rag‘batlantirish o‘rniga tanish-bilishchilik qilishi natijasida yuzlab bitiruvchilaridan birontasi ham oliy ta’limga kirmagan maktab direktori o‘z joyini natijaga ishlaydigan, yangi g‘oyalari bor nomzodlar uchun bo‘shatishi kerakmasmi?”, deb javob qaytardi.
“Ushbu deputatimiz taklifiga ko‘ra, yillar davomida maktabni o‘zining shaxsiy mulkidek qilib olib, malakali o‘qituvchini ishga olish va rag‘batlantirish o‘rniga tanish-bilishchilik qilishi natijasida yuzlab bitiruvchilaridan birontasi ham oliy ta’limga kirmagan maktab direktoriga chora ko‘ra olmasak yoki chora ko‘rsak-da, ushbu deputatimiz taklifiga ko‘ra, ular sudga borib yutib chiqib, o‘z ishiga qayta tiklansa, unday direktorlardan mamlakatimiz kelajagi uchun nima naf? Nima sababdan, ular shuncha bitiruvchisining kelajagiga befarq bo‘lgani yetmagandek, biz ham bunga befarq qarab turishimiz kerak?
Lekin bu degani bitiruvchilarining 100 foizi yoki aksariyati OTMga kirishi shart degani emas, bunday talab umuman qo‘yilmagan vazirlik tomonidan”, — degan xalq ta’limi vaziri.
Uning aytishicha, Yangiyo‘l tumanidagi 1968-yilda qurilgan, juda ta’mirtalab 45-maktabda o‘quvchilari soni quvvatidan ikki barobar ko‘p bo‘lishiga qaramay, tumanda aynan shu maktab OTMga kirish bo‘yicha eng yaxshi natijaga ega. Bunga direktor tashabbuskorligi va yaxshi jamoani shakllantira oladigan rahbar ekanligi evaziga erishilgan.
Aksincha, binosi bu maktabnikidan ancha yaxshi bo‘lgan hamda o‘quvchilari sonining maktab quvvatiga nisbati kamroq bo‘lgan qator boshqa maktablarga kirganida direktori ishni to‘g‘ri tashkil qilmagani uchun ulardagi jamoa ham o‘zaro hamjihatmasligiga va natija ham pastligiga guvoh bo‘lgan.
Vazirning ta’kidlashicha, tashqi faktorlar bir xil bo‘lsa-da (dastur, kitoblar, ajratilayotgan mablag‘ va h.k.), maktabdagi muhit va natija maktab direktoriga ko‘p jihatdan bog‘liqligini aynan shu misollarda ham ko‘rsa bo‘ladi.
“Populizm muhimroqmi yoki farzandlarimizning kelajakdagi muvaffaqiyati uchun direktorlarni harakatga undashmi? Qadriyatlarimiz va tanlovimiz ikki xil ekan.
Bu deputatimizning internetda anchagina mashhurligini inobatga olib, aytayotgan gaplari qanday oqibatga olib kelishiga yaxshiroq e’tibor qaratsalar to‘g‘ri bo‘lar edi”, — degan Sherzod Shermatov.
Rasul Kusherbayev bunga javoban oliy ta’lim muassasasiga bitiruvchilari kira olmaganligi uchun maktab rahbarlarining ishdan bo‘shatilishini qonunlar, shu jumladan, Mehnat kodeksi talablariga to‘g‘ri kelmasligini, bu noto‘g‘ri strategiya ekani va bu sabab bilan ishdan ketganlar bo‘lsa, sud orqali muammoni hal qilishi mumkinligini aytib o‘tdi.
“Men qonun ustuvor bo‘lishini istayman, xolos, o‘lay agar, boshqa maqsadim yo‘q. To‘g‘risi, bu sabab bilan ishdan ketgan birorta maktab direktoriniyam tanimayman.
Biroq hurmatli vazirimiz meni buning uchun populizm va qator va hokazo masalalarda ayblabdilar. Agar demokratik davlatlar qatori qonun ustuvorligini ta’minlash va muammoni sud orqali hal qilish populizm bo‘lsa, unda men emas, avvalo, qonunlar va Mehnat kodeksi bosh populist bo‘lib qolmaydimi? Men ‘tut prichem’ agar qonunlar shunday va kamiga sud degan hokimiyatimiz bo‘lsa”, — deydi deputat.
Shu bilan birga, xato o‘ylayotgan va fikrlayotgan bo‘lsa, vazir va butun vazirlik tizimidan, agar ishchanlik obro‘siga putur yetib qolgan bo‘lsa, minglab o‘qituvchilardan uzr so‘rashini aytgan.
“Biroq baribir ta’limmi, sog‘liqni saqlashmi, huquqni muhofaza qilishmi, qo‘yingki, barcha sohada, avvalo, qonunlarga so‘zsiz rioya qilish, inson huquqlarini ta’minlashni bosh maqsadga aylantirishga amalda to‘liq erishmas ekanmiz, biz yana ko‘p yillar orqada qolishimiz mumkin, degan fikrimdan qaytmayman”, — deb ta’kidlagan Kusherbayev.
Eslatib o‘tamiz, 2020-yil 14-noyabr kuni Qarshi shahrida xalq ta’limi vaziri Sherzod Shermatov rahbarligidagi yig‘ilishda 20 nafar maktab direktori birorta bitiruvchilarining OTMlarga kirmaganligi sababli o‘z vazifasidan ozod etilgan edi. Shu bilan birga, Navoiy viloyatida ta’lim sifati past bo‘lgan 26 nafar maktab direktori, hamda 2 nafar xalq ta’limi bo‘limi mudiri, 3 nafar xalq ta’limi bo‘limi mudiri o‘rinbosari egallab turgan lavozimidan olingandi.
Izoh (0)