Юнусободдаги фожиадан сўнг ижарада яшаётган талабаларнинг шароитлари ўрганиладиган бўлди
Ўзбекистон бош вазири ўринбосари Беҳзод Мусаев бошчилигида Тошкент давлат иқтисодиёт университетида талабалар яшаш шароити ва ҳаракатланиши мониторингини йўлга қўйиш ва бу борадаги ишларни такомиллаштириш масаласида видеоселектор йиғилиши ўтказилди. Бу ҳақда Олий ва ўрта махсус таълим вазирлиги матбуот хизмати маълум қилди.
Йиғилишда Вазирлар Маҳкамасининг масъул ходимлари, Олий ва ўрта махсус таълим, Ички ишлар, Фавқулодда вазиятлар, Соғлиқни сақлаш, Адлия, Ахборот технологиялари ва коммуникацияларини ривожлантириш, Маҳалла ва оилани қўллаб қувватлаш, Қурилиш вазирликлари, Дин ишлари бўйича қўмита, Таълим сифатини назорат қилиш давлат инспекцияси, тасарруфида олий таълим муассасалари бўлган вазирлик ва идораларнинг раҳбарлари, Қорақалпоғистон Вазирлар Кенгаши, вилоятлар ва Тошкент шаҳар ҳокимларининг ёшлар ва ижтимоий масалалар бўйича ўринбосарлари, олий таълим муассасалари ректор ва проректорлари иштирок этди.
Муҳокама жараёнида олий таълим муассасалари ректорлари, проректорлари, декан, шунингдек, ёшлар бўйича етакчилари томонидан талабаларнинг яшаш шароитларини таҳлил қилиш ўз ҳолига ташлаб қўйилганлиги танқид қилинди.
Хусусан, талабалар ижарада қаерда яшамоқда, кимникида турибди, яшаш шароити қандай, дарсдан кейин нима иш билан машғул бўлади, бўш вақтини қандай ўтказади, бу талабаларнинг ўқиш жараёнига қандай таъсир кўрсатмоқда каби жиддий масалалар кўриб чиқилди.
Айниқса, масъуллар томонидан талабаларнинг хусусий уй-жойларда яшаш шароитлари билан бевосита жойига чиққан ҳолда ўрганилмаётгани кўрсатиб ўтилди.
Талабалар томонидан ижарага олинаётган хонадонларнинг ёнғин ва бошқа техник хавфсизлик талабларига жавоб бермаслиги, талабаларда бирламчи ёнғин ва бошқа техник хавфсизлик бўйича билимларининг етарли эмаслиги натижасида турли нохуш ҳодисалар рўй бермоқда.
Муҳокама мажлисида ижарада турадиган талабаларнинг ва ижара берувчи фуқаролар ўртасида муносабатни шаффофлаштириш, ижара учун берилган уй-жойларнинг ҳолати, ота-оналар ва талабалар учун ижарага бериладиган уй-жойлар тўғрисида ягона ахборот тизимини яратиш каби масалаларга ҳам тўхталиб ўтилди.
Муҳокама натижасида қуйидагиларни амалга оширишга келишиб олинди:
- Олий ва ўрта махсус таълим вазирлиги, Ички ишлар вазирлиги, Соғлиқни сақлаш вазирлиги ҳамда Фавқулодда вазиятлар вазирлигининг «Талабалар яшаш шароити ва ҳаракатланиши мониторингини йўлга қўйиш ва бу борадаги ишларни такомиллаштириш» юзасидан қўшма қарорини қабул қилиш ва унда ҳар бир ҳудудда Ишчи гуруҳ тузиб, ижарада ва яқин қариндошиникида яшаётган талабалар бўйича ўрганиш тизимини жорий қилиш;
- ҳар бир ҳудуд кесимида талабалар турар жойлари ва ижарадаги талабаларнинг яшаш шароити ва турар жойи ҳолатини, айниқса, ёнғин ва бошқа техник хавфсизлик талабларига мос келишини тўлиқ танқидий ва таҳлилий ўрганиш;
- олий таълим муассасалари проректорларининг лавозим вазифаларини қайта кўриб чиқиб, уларнинг талабалар турар жойи ва ижарада яшайдиган талабалар билан ишлаш тизимини яратиш;
- Фавқулодда вазиятлар вазирлигининг жойлардаги бошқарма ва бўлимлари билан биргаликда ҳар бир талабалар турар жойидаги ёнғин хавфсизлиги ва бошқа техник хавфсизлик масалаларини ўрганиб чиқиш;
- талабаларга бирламчи ёнғин ва бошқа техник хавфсизлик масалалари бўйича етарли тушунтиришлар бериш;
- ижарада турадиган талабалар билан гуруҳ мураббийлари, профилактика инспекторлари ва маҳалла масъуллари томонидан ҳамкорликда олиб бориладиган профилактик тадбирлар қамрови ва сифатини ошириш;
- вилоят марказларига ёки Тошкент шаҳрига узоқ туманлар ва бошқа вилоятлардан олий таълим муассасасига ўқишга келиб, ижарада турадиган талабаларни вақтинчалик рўйхатга олиш механизмини ишлаб чиқиш ва амалиётга жорий этиш;
- олий таълим муассасаларига ўқишга қабул қилинган талабаларнинг эҳтиёжидан келиб чиқиб, талабалар турар жойларини қуриш юзасидан ишлаб чиқилган манзилли дастурни такомиллаштириш.
Мазкур масала ҳар ҳафта Вазирлар Маҳкамаси томонидан назорат ва таҳлил қилиб борилади.
Эслатиб ўтамиз, 27 февраль куни Юнусободда ижарада яшовчи беш талабанинг мурдаси топилди. Жабрланувчиларнинг ўлими номаълум моддадан ўткир заҳарланиш натижасида юз берган.
Бундан аввал Ўзбекистонда талабалар оиласининг бетоб аъзосини парвариш қилиш учун ҳам академик таътил олиши мумкин бўлиши, Қарши давлат университети ҳудудида талабалар учун 800 ўринли ётоқхона қурилиши ҳамда Олий ва ўрта махсус таълим вазири Абдуқодир Тошқулов бир қатор ректорларни танқид қилгани ҳақида хабар берилганди.
