Maktab direktorligi lavozimiga nomzodni tayinlash jarayonini shaffoflashtirish maqsadida, O‘zbekiston Respublikasi Prezidentining 2020-yil 16-noyabrdagi (PF-6408) farmoniga ko‘ra, endilikda nomzod Xalq deputatlari tuman (shahar) kengashlarining tavsiyasi bilan tayinlanadi. Bu haqda 26-yanvar kuni Xalq ta’limi vazirligida bo‘lib o‘tgan matbuot anjumanida vazir Sherzod Shermatov ma’lum qildi.

Sherzod Shermatov

Foto: O‘zbekiston Respublikasi Oliy Majlis Senati

“Maktab direktorini tayinlashda mahalliy kengashlarning roli ham muhim ahamiyatga ega. Avvallari maktab direktori tayinlanganda ‘kimningdir jiyani, kimningdir tanish-bilishi ekan’, degan gap-so‘zlar ham bo‘lar edi. Lekin mana 2021-yil 1-yanvardan yangi tizim bo‘yicha hammasi shaffof tarzda amalga oshiriladi. Ya’ni har bir direktor 3 yillik ish reja dasturini ishlab chiqadi va uni mahalliy kengashlarga taqdim qiladi. Shu taqdimot jarayoni to‘liq tasvirga olinib, YouTube ijtimoiy tarmog‘iga joylanadi. Chunki bu birinchidan shaffoflikni ta’minlaydi, ikkinchidan 2-3 yildan keyin hisobot bo‘lganida o‘sha videoni ko‘rib, va’da qilingan ishlar bo‘yicha javob beradi”, – dedi Sherzod Shermatov.

Uning aytishicha, ushbu yangi tizim quyidagi tarzda amalga oshiriladi:

  • bo‘sh (vakant) direktor lavozimi uchun e’lon beriladi va vazirlik rasmiy veb-saytida (ehtiyojdan kelib chiqib, davriy nashrlarda) joylashtiriladi;
  • nomzod tanlovda ishtirok etish bo‘yicha ariza bilan murojaat etadi va vazirlikning ish.uzedu.uz sayti orqali tanlovda ishtirok etish haqida ariza beradi;
  • nomzodlarning belgilangan malaka talablariga mosligi o‘rganiladi va malaka talabiga mos nomzodlar Xalq deputatlari tuman (shahar) kengashlariga tavsiya etiladi;
  • nomzodlarning umumta’lim muassasasi ko‘rsatkichlarini kelgusi 3 yilda yuqori darajaga olib chiqish bo‘yicha eng yaxshi dastur egasi tanlab olinadi va tanlov jarayonlari videotasvirga olinib, to‘g‘ridan to‘g‘ri namoyish etiladi;
  • tanlovdan o‘tgan nomzodlar maktab direktori lavozimiga tayinlanadi.

Ta’kidlanishicha, bu bilan maktabga jonkuyar, fidoyi direktor tayinlanadi va bu “qizil” ko‘rsatkichga ega bo‘lgan maktablarni “yashil”ga olib chiqishning eng katta faktori bo‘ladi.