Гулистонда жарима майдончасидан машинасини чиқариб беришини сўраб, ЙҲХБ ходимига пора таклиф қилган ҳайдовчи қўлга олинди

Сирдарё вилояти Гулистон шаҳрида ЙҲХБ ходимига пора сифатида 500 АҚШ доллари таклиф қилган ҳайдовчи ушланди, дея хабар қилмоқда ИИВ.

Маълум қилинишича, 2021 йил 27 январь куни соат 15:00 да Сирдарё вилояти ИИБ Жиноят қидирув бўлими ҳамда Гулистон шаҳар прокуратураси ходимлари билан ҳамкорликда Сирдарё вилояти Гулистон шаҳар 3-мавзе ҳудудида жойлашган жарима майдончасида тезкор тадбир ўтказилган.

Тадбир давомида, фуқаро А.Ф сафдор Ш.А.га Labo машинасини жарима майдончасидан чиқариб бериш ва расмийлаштирилган маъмурий баённомани йўқ қилиш эвазига, ходим томонидан бир неча маротаба огоҳлантиришига қарамасдан, жарима майдончасининг қоровул хонасида 500 АҚШ доллари миқдоридаги пулни пора тариқасида берган вақтида тадбир иштирокчилари томонидан далилий ашё билан ушланган.

Мазкур ҳолат юзасидан Гулистон шаҳар прокуратураси томонидан терговга қадар текширув ҳаракатлари олиб борилиб, А.Ф.га нисбатан Жиноят кодексининг 211-моддаси 1-қисми (пора бериш) билан жиноят иши қўзғатилиб, дастлабки тергов ҳаракатлари олиб борилмоқда.

Бундан аввал Андижонда мусиқа мактаби директори 500 доллар пора билан ушлангани, Фарғонада 8 гектар ер олишда ёрдам бериш эвазига 8 минг доллар олган собиқ кадастр ходими ушлангани ҳамда Гулистонда 1,5 минг доллар эвазига Миллий гвардия тизимига ишга киритиб қўйишни ваъда қилган шахс қўлга олингани ҳақида хабар берилганди.