Сирдарё вилоятида ўлдириш билан қўрқитиб, тадбиркордан 45 000 АҚШ доллари талаб қилган шахслар ушланди, дея хабар бермоқда вилоят ИИБ ахборот хизмати.
Қайд этилишича, вилоят ҳудудида фаолият кўрсатувчи бир неча клиника, дорихона, иссиқхона, автомобилларга ёқилғи қуйиш шохобчалари, тижорат дўконлари ва бошқа тармоқ савдо мажмуаларини ўз ичига олган корхона раҳбари, хусусий тадбиркор Д.М. 2021 йилнинг 5 февраль куни яшаш манзилидан онаси К.И.ни тўйхонага олиб бориш мақсадида йўлга тушган.
Тадбиркор бошқарувидаги Malibu-2 автомашинаси ҳаракатланиб кетаётган вақтда унинг олдини нотаниш Nexia-2 автомашинаси тўсиб, тадбиркорга олдиндан таниш бўлган ва муқаддам бир неча маротаба судланган А.Э. (тахаллуси «Местний») ўзининг 2 нафар ниқобланган шериги билан Д.М. бўйнига ўткир тиғли пичоқ тираб, уларга зудлик билан 45 000 АҚШ доллари миқдоридаги пулларни тўлаб беришини талаб қилган.
Улар тадбиркор бу ҳақда ҳуқуқ тартибот идораларига хабар қилган тақдирда онасининг гувоҳлигида ўлдириб кетишлари ва ҳеч нарсадан қайтмасликлари ҳақида таҳдид қилиб, бир неча кун муҳлат берган.
Шундан сўнг А.Э. ўзи сингари муқаддам бир неча маротаба судланган Р.Б. (тахаллуси «боксёр») билан бирга жабрланувчи Д.М.нинг яшаш манзилига борган.
Улар талаб қилинган пуллардан 17 000 АҚШ долларини зудлик билан топиб беришини ёки бўлмаса, ҳозирда жазони ижро этиш муассасаларида жазони ўтаб келаётган танишларини чиқартиришни ёхуд ноқонуний гиёҳванд моддалари билан муомала қилганлиги учун ҳозирда Сирдарё вилояти ИИБ Тергов органлари иш юритувида бўлган жиноят иши бўйича қамоққа олинган Р.Б.нинг қариндоши К.Б.ни ҳар қандай йўллар билан бўлса-да, жиноий жавобгарликдан чиқариб беришни талаб қилиб, ўлдириш билан таҳдид қилган.
Мазкур ҳолат юзасидан Ўзбекистон ИИВ, ДХХ, Сирдарё вилояти ИИБ ҳамда ДХХ Сирдарё вилоят бошқармаси ходимлари томонидан ҳамкорликда ўтказилган тезкор тадбирлар натижасида фуқаролар А.Э. ҳамда Р.Б. жабрланувчи Д.М.дан товламачилик йўли билан талаб қилинган пуллардан бир қисмини, яъни кимёвий ишлов берилган 10 000 АҚШ долларини олган вақти далилий ашёлар билан қўлга олинди.
Ҳозирда ҳолат юзасидан Сирдарё вилоят ИИБ Тергов бошқармаси томонидан Жиноят кодексининг 165-моддасининг (товламачилик) тегишли қисмлари билан жиноят иши қўзғатилиб, жиноятчилар Жиноят процессуал кодексининг 221-моддаси (ушлаб туриш) асосида ушланган. Ҳозирда тергов ҳаракатлари давом этмоқда.
Бундан аввал Сирдарёда тадбиркорларга зўравонлик қилиб, улардан улуш ундириб келган жиноий тўда аъзолари, Тошкент вилоятида 55 миллион сўм миқдоридаги қалбаки пулларни муомалага киритмоқчи бўлган шахслар ҳамда мазкур вилоятда гиёҳванд моддаларининг ноқонуний савдоси билан шуғулланувчи гуруҳ қўлга олингани ҳақида хабар берилганди.
Изоҳ (0)