Тошкент вилояти Оҳангарон туманидаги 48-сонли манзил-колонияда диний маъруза эшитган Ф. исмли маҳбусни куч ишлатар ходимлар аёвсиз калтаклагани эълон қилинган, мазкур ҳолат Омбудсман назоратига олиниб, вазиятга ойдинлик киритилгач, натижаси бўйича ОАВга батафсил маълумот тақдим этилиши таъкидланганди.
ИИВ Жазони ижро этиш бош бошқармаси матбуот хизматининг «Дарё»га маълум қилишича, мазкур хабар ИИВ Жазони ижро этиш бош бошқармаси томонидан ўрганилганида қуйидагилар маълум бўлди.
Маҳкум Ф.М.га манзил-колонияда жазони ўташ шартлари, маҳкумларнинг ҳуқуқ-мажбуриятлари, муассаса маъмуриятининг қонуний талабларини бажариш ва интернет тармоғига уланувчи, видео ва овоз ёзишга мўлжалланган уяли алоқа воситасидан фойдаланиш мумкин эмаслиги тушунтирилган. Бироқ у ички тартиб-қоидаларга амал қилмасдан Samsung Note 5 маркали телефондан фойдаланган. Шундан сўнг манзил-колония бошлиғининг қарори асосида интизомий жазога тортилган.
Унинг фойдаланган уяли алоқа воситаси хотирасида аниқланган диний материалларни Ўзбекистон ҳудудида тақиқланган ёки тақиқланмаганлигига аниқлик киритиш мақсадида судга оид диншунослик экпертизаси тайинланган.
Маҳкум Ф.М.дан уяли алоқа воситаси ходимлар томонидан расмийлаштириб олиниши ҳамда интизомий бўлинмага киритиш жараёни билан боғилиқ суриштирув ишлари вақтида унга колония ходимлари томонидан ҳеч қандай руҳий ва жисмоний тазйиқ ўтказилмаганлиги маълум қилинган. Шунингдек, бирламчи тиббиёт текшируви натижасига кўра унинг баданида бирор-бир тан жароҳати излари аниқланмаган.
Ҳозирда муассаса маъмуриятига нисбатан туҳмат қилиш ва ёлғон хабарларни тарқатиш сабаблари текширилмоқда.
Жазони ижро этиш муассасаларида маҳкумларнинг ҳуқуқ ва эркинликларининг муҳофазаси доимий равишда прокуратура органлари ҳамда Олий Мажлиснинг Инсон ҳуқуқлари бўйича вакили (Омбудсман) томонидан назорат қилинади.
Ижтимоий тармоқларнинг фаоллари томонидан текширилмаган ахборотни жамоатчиликка тарқатиш орқали бирор-бир мақсадга эришишга ҳаракат қилиш жиноий жавобгарликни келтириб чиқаради.
ИИВ Жазони ижро этиш бош бошқармаси матбуот хизматининг таъкидлашича, Жазони ижро этиш тизимидаги муассасаларда жазо муддатини ўтаётган шахслар содир қилган жиноятидан қатъи назар бир хил ҳуқуқ ва эркинликларга эга бўлиб, улардан режим талабларига риоя қилиш бирдек талаб қилинади.
Муассасаларда ўрнатилган тартиб-қоидаларга риоя қилмай, тартиббузарлик содир қилган маҳкумларга нисбатан Жиноят-ижроия кодексининг 105-моддаси талаблари асосида интизомий жазо чоралари қўлланилади.
Бундан аввал марҳум турколог Андрей Кубатин қамоқда қаттиқ қийноқларга солингани, Андижонда фуқаронинг қийноққа солиниши ва касалхонада вафот этишига алоқадор ИИО ходимларига суд ҳукми ўқилгани ҳамда Ўзбекистондаги қамоқхоналарда маҳкумларнинг қийноққа солиниши ҳақидаги видеолавҳа юзасидан баёнот берилгани ҳақида хабар берилганди.
Изоҳ (0)