Косон тумани ҳокими Асрол Бойқараев Captiva русумли 70 027 КАА хизмат автомобили билан боғлиқ ЙТҲ ҳақида гапириб, рулда ўзи ёки ўғли бўлган деган фаразларни рад этди. Бу ҳақда ҳоким иштирокидаги матбуот анжуманида маълум қилинди, дея хабар берди «Дарё» мухбири.
Маълум бўлишича, 7 февраль куни Косон тумани ҳокимлиги шу каби саволларга жавоб бериш ҳамда туманда бўлаётган ўзгаришлардан журналист ва блогерларни хабардор қилиш мақсадида пресс-тур ташкил қилган.
Ҳоким Асрол Бойқараев «Дарё» мухбирининг «Хизмат автомобилингиз билан боғлиқ ЙТҲ ҳақидаги хабарларда машина бошқарувида ўзингиз ёки ўғлингиз бўлгани айтилди. Бу ҳақда хабар берган нашр ҳам ЙТҲ оқибатида вафот этган фуқаро яқинларига таяниб, шуни ёзди. Хўш, машина рулида сиз ёки ўғлингиз бўлгани ҳақидаги фаразлар қай даражада тўғри?» деган саволига жавоб берар экан, бу фаразлар нотўғрилигини айтди.
«Ўзи бир нафар ўғлим бор. Ҳали мактаб ёшида ва Тошкент шаҳридаги мактабда таҳсил олади. Қолган фарзандларим эса қиз болалар. Косондаги хизмат уйида оилам билан яшайман. Фарзандларим ўқишда бўлгани сабаб Тошкентдан Косонга келмаган ҳам. Яъни машинани ўғлим бошқаргани ҳақидаги гап нотўғри», — деди ҳоким Асрол Бойқараев.
Туман ҳокими ЙТҲ содир бўлган кун ва вақтда — 2020 йил 12 декабрда туман прокурори, ИИБ бошлиғи ва солиқ раҳбари иштирокида 23 нафар ММТП раҳбарлари билан йиғилиш ўтказаётган бўлганини билдирди.
«Қишлоқ хўжалиги ходимлари куни байрамидан бир кун олдин — 2020 йил 12 декабрь куни тўртта сектор раҳбарлари 23 та ММТП раислари билан йиғилиш ўтказаётгандик. Шу пайт ёрдамчим келиб, хизмат автомобилимда ЙТҲ содир бўлганини айтди. Нима бўлган экан деб сўраганимда, бир одамни сал туртиб юборибди деди. Шу пайт ИИБ бошлиғини воқеа жойига юбориб, нима бўлганини батафсил ўрганишини сўрадим. ИИБ бошлиғи воқеа жойига бориб, ЙТҲда 60 ёшли фуқаро вафот этганини, аммо ҳали шахсини аниқлаштирмаганини хабар берди. Тезда кимлигини билдик. Кейин билсак, фуқаро ЙТҲ оқибатида воқеа жойида вафот этган экан. Қишлоқ хўжалиги байрами ўтгач, марҳумнинг уйига таъзияга бордик. Уйдагиларига ҳамдардлик билдириб, ҳайдовчим айби билан содир бўлган ЙТҲ учун узр сўрадим. Тўғриси, барчамиз рулда юрамиз. Бундай фалокатлар содир бўлмайди деб олдиндан айтиш қийин. Шунингдек, ҳеч ким бундай воқеа бўлсин, демайди», — деди Асрол Бойқараев.
Туман ҳокими ЙТҲ содир бўлган пайтда хизмат автомобилида бўлганда фуқарога, албатта, биринчи ёрдам кўрсатган бўлиши мумкинлигини қўшимча қилди.
«ЙТҲ содир бўлган пайтда мен автомобилда бўлмаганман. Кўпчилик ҳокимнинг ўзи ўша ерда бўлган ва қочиб кетган деган гапни айтяпти. Агар ўша куни машинамда бўлганимда фуқарога, албатта, биринчи ёрдамни кўрсатардим. Қолаверса, машинада бўлган бўлсам, бор эдим десам ҳам барибир рулда ўтирган одам айбдор бўлар эди-ку. Нега энди машинада бўла туриб, буни яширишим мумкин», — деди Асрол Бойқараев.
Ҳоким Асрол Бойқараев ЙТҲ қандай содир бўлганини ҳам айтиб ўтди.
«Билишимизча, марҳум тез ёрдам машинасини ҳайдаган. Шу йили нафақага чиқиши керак экан. Айтилишича, у ўша куни ‘бордюръдан сакраб ўтган, машина эса бу ёқдан борган, натижада фуқарони уриб юборган», — деди ҳоким.
Эслатиб ўтамиз, Косон тумани ҳокими Асрол Бойқараев ёки унинг ўғли бошқаргани айтилган Captiva 60 ёшли фуқарони уриб юборгани, ЙТҲ оқибатида фуқаро воқеа жойида вафот этгани ҳақида хабар берилганди. Қашқадарё вилоят ИИБ берган маълумотда ҳокимнинг 70 027 КАА давлат рақам белгили Captiva’си иштирокидаги ЙТҲ 2020 йилнинг 12 декабрь куни содир бўлгани, ЙТҲ содир бўлган пайтда автомобилни ҳоким ўринбосарининг ҳайдовчиси Раҳим Жўраев бошқаргани ёзилганди.
Воқеа юз берган жойда бўлган гувоҳлар эса ЙТҲ кечки соат 20:00 атрофида содир этилганини айтиб, автоҳалокат содир этилган 70 027 КАА давлат рақамли Captiva ичида туман ҳокими, хотини ва қизи бўлганини билдирганди. Шу воқеадан сўнг ҳокимнинг ҳайдовчиси алмаштирилган. Айб Раҳим Жўраевнинг зиммасига юкланган, у эса айбсизлигини таъкидлаган.
«Дарё» мухбири билан суҳбатлашган Косон тумани ҳокимлиги ахборот хизмати раҳбари Дилшод Набиев эса мазкур воқеага муносабат билдириб, «Ҳокимнинг шу пайтга қадар автомобиль бошқарганини кўрмаганман. Ўша куни ҳам рулда ўзи бўлган, деган гапга қўшилмайман. Ҳоким ҳам мазкур хабарни рад этиб, ўша воқеа содир бўлганини ўзи ҳам кейинчалик эшитганини айтди», деганди.
Изоҳ (0)