Фарғона вилоятининг Олтиариқ туманида отасининг уйидан 1,9 минг доллар ва 3 миллион сўм ўғирлаган ўғилга нисбатан жиноят иши қўзғатилди. Бу ҳақда вилоят ИИБ матбуот хизмати хабар берди.
Маълум бўлишича, 15 январь куни Олтиариқ тумани «Фаровон» маҳалласи ҳудудида яшовчи Т.Б. ИИБга мурожаат қилиб, унда 2020 йилнинг 25 декабрь кунидан 15 январь кунигача бўлган вақт оралиғида номаълум шахс яшаш хонадонига ғайриқонуний равишда кириб, ётоқхонасидаги сандиқ ичида бўлган 1 900 доллари ва 3 миллион сўм пулларини яширин равишда ўғирлаганлигини маълум қилган.
Ҳолат юзасидан Олтиариқ тумани ИИБ ҳузуридаги тергов бўлими томонидан Жиноят кодексининг 169-моддаси 2-қисми «г» бандлари (ўғрилик) билан жиноят иши қўзғатилган.
Олиб борилган тезкор-қидирув тадбирлари давомида мазкур жиноятни жабрланувчи Т.Б.нинг бирга яшовчи ўғли А.Т. содир этганлиги аниқланиб, жиноят иши Жиноят кодексининг 169-моддаси 2-қисми «г» бандидан Жиноят кодексининг 169-моддаси 1-қисмига қайта малакаланган.
Айни пайтда тергов ҳаракатлари олиб борилмоқда.
Маълумот учун, Жиноят кодексининг 169-моддаси (ўғрилик) 1-қисмида кўрсатилган жиноятни содир этган шахс уч йилгача озодликдан маҳрум қилиш билан жазоланиши мумкин.
Изоҳ (0)