Koson tumani hokimi Asrol Boyqarayev Captiva rusumli 70 027 KAA xizmat avtomobili bilan bog‘liq YTH haqida gapirib, rulda o‘zi yoki o‘g‘li bo‘lgan degan farazlarni rad etdi. Bu haqda hokim ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ma’lum bo‘lishicha, 7-fevral kuni Koson tumani hokimligi shu kabi savollarga javob berish hamda tumanda bo‘layotgan o‘zgarishlardan jurnalist va blogerlarni xabardor qilish maqsadida press-tur tashkil qilgan.
Hokim Asrol Boyqarayev “Daryo” muxbirining “Xizmat avtomobilingiz bilan bog‘liq YTH haqidagi xabarlarda mashina boshqaruvida o‘zingiz yoki o‘g‘lingiz bo‘lgani aytildi. Bu haqda xabar bergan nashr ham YTH oqibatida vafot etgan fuqaro yaqinlariga tayanib, shuni yozdi. Xo‘sh, mashina rulida siz yoki o‘g‘lingiz bo‘lgani haqidagi farazlar qay darajada to‘g‘ri?” degan savoliga javob berar ekan, bu farazlar noto‘g‘riligini aytdi.
“O‘zi bir nafar o‘g‘lim bor. Hali maktab yoshida va Toshkent shahridagi maktabda tahsil oladi. Qolgan farzandlarim esa qiz bolalar. Kosondagi xizmat uyida oilam bilan yashayman. Farzandlarim o‘qishda bo‘lgani sabab Toshkentdan Kosonga kelmagan ham. Ya’ni mashinani o‘g‘lim boshqargani haqidagi gap noto‘g‘ri”, — dedi hokim Asrol Boyqarayev.
Tuman hokimi YTH sodir bo‘lgan kun va vaqtda — 2020-yil 12-dekabrda tuman prokurori, IIB boshlig‘i va soliq rahbari ishtirokida 23 nafar MMTP rahbarlari bilan yig‘ilish o‘tkazayotgan bo‘lganini bildirdi.
“Qishloq xo‘jaligi xodimlari kuni bayramidan bir kun oldin — 2020-yil 12-dekabr kuni to‘rtta sektor rahbarlari 23 ta MMTP raislari bilan yig‘ilish o‘tkazayotgandik. Shu payt yordamchim kelib, xizmat avtomobilimda YTH sodir bo‘lganini aytdi. Nima bo‘lgan ekan deb so‘raganimda, bir odamni sal turtib yuboribdi dedi. Shu payt IIB boshlig‘ini voqea joyiga yuborib, nima bo‘lganini batafsil o‘rganishini so‘radim. IIB boshlig‘i voqea joyiga borib, YTHda 60 yoshli fuqaro vafot etganini, ammo hali shaxsini aniqlashtirmaganini xabar berdi. Tezda kimligini bildik. Keyin bilsak, fuqaro YTH oqibatida voqea joyida vafot etgan ekan. Qishloq xo‘jaligi bayrami o‘tgach, marhumning uyiga ta’ziyaga bordik. Uydagilariga hamdardlik bildirib, haydovchim aybi bilan sodir bo‘lgan YTH uchun uzr so‘radim. To‘g‘risi, barchamiz rulda yuramiz. Bunday falokatlar sodir bo‘lmaydi deb oldindan aytish qiyin. Shuningdek, hech kim bunday voqea bo‘lsin, demaydi”, — dedi Asrol Boyqarayev.
Tuman hokimi YTH sodir bo‘lgan paytda xizmat avtomobilida bo‘lganda fuqaroga, albatta, birinchi yordam ko‘rsatgan bo‘lishi mumkinligini qo‘shimcha qildi.
“YTH sodir bo‘lgan paytda men avtomobilda bo‘lmaganman. Ko‘pchilik hokimning o‘zi o‘sha yerda bo‘lgan va qochib ketgan degan gapni aytyapti. Agar o‘sha kuni mashinamda bo‘lganimda fuqaroga, albatta, birinchi yordamni ko‘rsatardim. Qolaversa, mashinada bo‘lgan bo‘lsam, bor edim desam ham baribir rulda o‘tirgan odam aybdor bo‘lar edi-ku. Nega endi mashinada bo‘la turib, buni yashirishim mumkin”, — dedi Asrol Boyqarayev.
Hokim Asrol Boyqarayev YTH qanday sodir bo‘lganini ham aytib o‘tdi.
“Bilishimizcha, marhum tez yordam mashinasini haydagan. Shu yili nafaqaga chiqishi kerak ekan. Aytilishicha, u o‘sha kuni ‘bordyur’dan sakrab o‘tgan, mashina esa bu yoqdan borgan, natijada fuqaroni urib yuborgan”, — dedi hokim.
Eslatib o‘tamiz, Koson tumani hokimi Asrol Boyqarayev yoki uning o‘g‘li boshqargani aytilgan Captiva 60 yoshli fuqaroni urib yuborgani, YTH oqibatida fuqaro voqea joyida vafot etgani haqida xabar berilgandi. Qashqadaryo viloyat IIB bergan ma’lumotda hokimning 70 027 KAA davlat raqam belgili Captiva’si ishtirokidagi YTH 2020-yilning 12-dekabr kuni sodir bo‘lgani, YTH sodir bo‘lgan paytda avtomobilni hokim o‘rinbosarining haydovchisi Rahim Jo‘rayev boshqargani yozilgandi.
Voqea yuz bergan joyda bo‘lgan guvohlar esa YTH kechki soat 20:00 atrofida sodir etilganini aytib, avtohalokat sodir etilgan 70 027 KAA davlat raqamli Captiva ichida tuman hokimi, xotini va qizi bo‘lganini bildirgandi. Shu voqeadan so‘ng hokimning haydovchisi almashtirilgan. Ayb Rahim Jo‘rayevning zimmasiga yuklangan, u esa aybsizligini ta’kidlagan.
“Daryo” muxbiri bilan suhbatlashgan Koson tumani hokimligi axborot xizmati rahbari Dilshod Nabiyev esa mazkur voqeaga munosabat bildirib, “Hokimning shu paytga qadar avtomobil boshqarganini ko‘rmaganman. O‘sha kuni ham rulda o‘zi bo‘lgan, degan gapga qo‘shilmayman. Hokim ham mazkur xabarni rad etib, o‘sha voqea sodir bo‘lganini o‘zi ham keyinchalik eshitganini aytdi”, degandi.
Izoh (0)