Мьянманинг ҳарбийлар томонидан ҳибсга олинган президенти номаълум жойга кўчирилди

Ҳукумат тўнтарилиши пайтида ҳарбийлар томонидан ҳибсга олинган Мьянма президенти У Вин Мьинт президент саройидан бошқа бинога кўчирилди, унинг қаердалиги номаълум дея хабар бермоқда «РИА Новости» «Демократия учун миллий лига» партияси раҳбарининг матбуот котиби У Чи Тога асосланиб.

«Президент ва унинг оиласи президент қароргоҳидан бошқа уйга кўчирилди», – деб ёзди Чжи То Facebook’даги саҳифасида.

Бошқа бир постида у давлат маслаҳатчиси (Мьянма бош вазири), Нобель мукофоти совриндори Аун Сан Су Чжининг соғлом ва ҳанузгача пойтахт Нейпьидодаги қароргоҳида уй қамоғида эканлигини эълон қилди.

«Аун Сан Су Чжи хоним соғлом, у давлат маслаҳатчиси қароргоҳида», – деб ёзган у.

У Чжи То 3 февраль куни Мьянма президенти ва давлат маслаҳатчиси Аун Сан Су Чжи икки банд бўйича айбланаётганини айтди.

Мьянма сиёсий маҳбусларга ёрдам уюшмасининг хабар беришича, ҳокимият армияга ўтказилгандан сўнг Нейпьидода 133 партия аъзоси, шу жумладан, парламентнинг катта гуруҳи ҳибсга олинган. Яна 14 киши Янгон ва мамлакатнинг бошқа шаҳарларида қамоққа олинган. Мьянма ОАВ 1- ва 2 февраль кунлари мамлакат бўйлаб жами 400 дан ортиқ одам қўлга олинганлигини хабар қилди.

Эслатиб ўтамиз, 1 февраль куни Мьянма ҳарбийлари мамлакатда ҳокимиятни қўлга киритганини эълон қилди, ҳукмрон партия раҳбарлари ва мамлакат президенти ҳибсга олинди. Қуролли кучлар бош қўмондони Мин Аунг Хлайн мамлакатнинг муваққат президенти этиб тайинланди ва мамлакатда бир йил муддатга фавқулодда ҳолат жорий этилди.

Давлат тўнтаришига сабаб қилиб ўтган йилги сайловлардаги сохталиклар ва сайлов комиссиясининг ҳаракатсизлиги кўрсатилди. 2020 йил ноябрда бўлиб ўтган сайловларда «Демократия учун миллий лига» партияси ҳукумат тузиш учун етарлича овоз тўплаган, ҳарбийлар томонидан қўллаб-қувватланган партия эса мағлуб бўлган.

БМТ бош котиби Антониу Гутерриш қуролли кучларнинг ҳаракатларини «Мьянмада амалга оширилган демократик ислоҳотларга жиддий зарар етказиш» дея қоралади. Шунингдек, АҚШ давлат котиби Энтони Блинкен Мьянма давлат раҳбарларининг ҳибсга олинишидан хавотир билдирди ва ҳарбийларни ҳибсга олинган сиёсатчиларни озод қилишга чақирди.

Ҳарбийлар, шунингдек, ўтган йилги сайлов натижаларини қайта текшириш учун сайлов комиссиясини ислоҳ қилишга ва янги сайловлардан сўнг ҳокимиятни сайланган партияга топширишга ваъда берди.