Англиянинг Ланкашир графлигидаги Блэкпул шаҳрида яшовчи Нэтен Каммингс 2020 йилда саратон, сепсис, менингит ва коронавирусни енгишга муваффақ бўлди. У бу йилни «жаҳаннам йили» деб атади, деб ёзади Daily Star.
Қайд этилишича, 2019 йил октябрь ойида 24 ёшли Каммингсга медуллобластома – мияда стол тенниси тўпи катталигидаги хавфли ўсма борлиги аниқланди.
Шифокорлар шошилинч равишда хавфли операция ўтказишди ва ўсманинг 90 фоизини олиб ташлашди.
Йигитнинг оиласи операциядан сўнг у билан содир бўладиган энг ёмон ҳодисага ҳам тайёр эди. Чунки шифокорлар Нэтен операцияда вафот этиши мумкинлиги, агар у операциядан омон қолса, шол бўлиб, гапира олмаслиги ҳақида огоҳлантирган.
Бироқ саккиз соатлик операцияни бошдан ўтказган британиялик йигит икки кун ўтгач оёққа турди. Аммо унинг қувончи узоққа чўзилмади.
Нэтен 30 декабрь куни, туғилган кунида, менингит касаллигидан вафот этиши мумкин эди. Йигит 2020 йил январидан мартигача кимёвий терапиядан ўтаётганда икки марта сепсис билан оғриган. 2021 йил январь ойида Каммингс яна менингит билан касалланиб қолди ва бир ҳафта ўтгач, унга коронавирус ташхиси қўйилди. Аммо йигитнинг ҳолати тўрт кундан кейин яхшиланди.
Нэтен нега у бирданига кўплаб касалликлар билан оғриганини тушунмайди. Аммо у оптимист бўлиб қолди ва ҳозирда бошқа одамларни ҳеч қачон таслим бўлмасликка чақирмоқда.
«Бу йил жаҳаннам йили бўлди. Саратон, кимёвий терапия, менингит, сепсис ва катаракта билан курашиш. Коронавирусдан ҳеч қандай муаммосиз омон қолганим ҳам ғалати», – деди Нэтен.
Изоҳ (0)