Сайловолди жараёнларда катта-катта ваъдалар берган партия раҳбарлари қаерда? Партия раҳбарлари жавоб беради

Ўзбекистонда 2019 йилнинг декабрь ойида Олий Мажлис Қонунчилик палатаси ва маҳаллий Кенгашлар депутатларининг сайлови бўлиб ўтган эди. Сайловолди жараёнларда жуда фаол бўлиб кўринган партия раҳбарлари сайловдан сўнг ижтимоий фаоллиги сусайиб қолгандек кўринмоқда. «Дарё» мухбири Мусулмонбек Иброҳимов партия раҳбарларининг ижтимоий фаоллиги, хусусан, воқеа-ҳодисаларга ўз муносабатини билдириб бориш кескин камайиб кетгани хусусида улардан қисқача интервью олди.

Партиялар сайловолди жараёнида дўмбирани олиб, тарақа-туруқ қилиб юрган бўлса, эндиликда амалий иш билан шуғулланяпти.

Имкон борича, нима иш қилинётгани ва нималарга эришилаётгани ҳақида ижтимоий тармоқларда ёритиб боришга ҳаракат қилинмоқда. Партиямизнинг сайти ва ижтимоий тармоқларда каналлари бор. Медиа режа бўйича сайловчиларимизга олиб борилаётган ишлар хусусида ахборот бериб бормоқдамиз.

Мамлакат бўйича 22 та округдан сайланган бўлсак, ҳар ойда бутун республика бўйича бўлмаса ҳам, ўзимизнинг округларга бориб ишлаяпмиз. Шунинг учун биз қилаётган ишлар халққа ва ОАВга кам кўринаётгандек.

Улуғбек Иноятов, Халқ демократик партияси марказий кенгаши раиси

Партия раҳбари сифатида фаолият бошлаганимга ҳали ҳеч қанча вақт бўлгани йўқ. Сизни ҳар қандай соҳада мувафаққиятга эришишингиз шу фаолиятдаги ишингизнинг ижобий динамикасига боғлиқ. Агар ижобий динамикага қараб ҳаракат қилмайдиган бўлсангиз, демак сизнинг ишингиз натижаси кўринмайди. Айтайлик, мени лавозимга муносиб кўрган марказий кенгаш, депутатлар ва умуман, партиядошлар олдида ижобий динамика билан кетмайдиган бўлсам, мен ўзимнинг обрўмни йўқотиб қўяман. Биласиз, обрў йиллаб мисқоллаб йиғилади. Уни бир кунда йўқотиб қўйишни хоҳламайман. Менинг эътиқодим табиатни ўрганиш, табиатни асраш, бундан бошқа нарса эмас. Ҳаракат қиламанки, ишларимиз ижобий динамикада кетади.

Комилжон Тожибоев, Ўзбекистон Экологик партияси марказий кенгаши раиси

Сайловолди жараёни – талабчанликни оширадиган пайт. Сайловга яқин қолгач ҳамма бор кучи билан кўпроқ овоз олишга ҳаракат қилади. Керак бўлса, ваъдалар, ҳар хил ҳолатларга муносабатлар берилади.

Аслида кўп ҳолатларга биз муносабат билдириб боряпмиз, муносабат бор. Депутатлар фаоллигини ошириш учун барибир озроқ вақт керак. Раис сифатида керакли жойда керакли тарзда фикрларимизни билдириб боряпмиз.

Мақтанишдан йироқмиз, лекин бир нарсани тан олиб айтиш керак: олдинги даража билан ҳозирги даражани солиштирадиган бўлса, бизнинг депутатлар эътибори кучлироқ. Масалан, илгари бирорта депутат ўз фикрини билдириб ўтирмас эди, бор бўлса ҳам жуда оз эди. Ҳозир эса нафақат бизнинг партия депутатлари, балки бошқа партия депутатлари ҳам ҳар томонлама жуда фаол: қилаётган иши билан ҳам, билдираётган фикрлари билан ҳам. Назаримда, бу жиҳатдан партиялар ўсганини барча тан олса керак. ОАВлари билан ҳамкорлик бўлгани, улар эркин бўлгани сабабли бизнинг мана шундай очиқ гаплашишга имконимиз бўляпти.

Актам Хаитов, O‘zLiDeP марказий кенгаши раиси

Бутун дунёда бўлгани каби Ўзбекистонда ҳам барча соҳалар каби, қайсидир маънода, партиялар фаолиятига ҳам таъсир кўрсатган бўлиши мумкин. Аввалгига ўхшаб катта мажлислар, ОАВ билан ишлаш ҳам чегараланган. Лекин шуни айтиб ўтишим керакки, бошқа партияларни билмадим, «Адолат» социал-демократик партиясига раис сифатида яқинда сайланган бўлишимга қарамай, шу нарсани гувоҳи бўлиб турибманки, иш жараёни авваллари қандай кетган бўлса, шундай давом эттиришга ҳаракат қилинмоқда. Ўша масалалар, ўша жараёнларни амалга ошириш бўйича ишлар кетмоқда.

Қилинаётган ишларни PR қилиш, ОАВга олиб чиқишда баъзи бир камчиликлар бўлиши мумкин ва мен буни табиий жараён деб ўйлайман. Биринчи имконият бўлиши билан ҳозир партияларнинг сусткашлиги ҳақидаги фикрларни бир четга суриб қўядиган фаолият бошланиб кетади».

Баҳром Абдуҳалимов, «Адолат» социал-демократик партияси марказий кенгаши раиси

Сайловолди жараёнларни сайловдан кейин ҳам ана шундай давом этишига имконият йўқ. Чунки сайлов пайти ўз номи билан жуда кучли рақобат, яъни бутун ҳаркатлар мақсадга йўналтирилган қисқа бир давр. У пайтда ҳамма кескин фаоллашди. Журналистлар ҳам, партиялар ҳам ўша пайтда жуда фаол бўлади ва худди шундай ҳаракатнинг беш йил давом этиши бу имконсиз. Ҳам моддий нуқтаи назардан, ҳам ижтимоий нуқтаи назардан бу нарсани таъминлаб бўлмайди.

Сайловчиларнинг норозилиги бу аввалдан йиғилиб қолган норозиликлар билан боғлиқ. Жамоатчиликнинг партиялардан норози бўлишига асос бор. Чунки партиялар ўтган даврда етарли даражада фаол бўлмаган, сайловчиларни электоратини оқламаган. Мана шу кайфият ҳануз сақланиб турибди ва ишончим комилки, биз буни қисқа муддат ичида ҳал қила олмаймиз. Одамларнинг ишончини қозониш осон иш эмас. Сайловдан кейинги қисқа бир давр учун фаолиятимизга баҳо берсак, «яхши»дан пастроқ деб баҳо берган бўлардик. Лекин ҳаракатларимиз давом этмоқда.

Сайловдан кейин ишлаш керак. Агар ишламасдан яна фаоллашиб баёнотлар билан юраверадиган бўлсак, натижа қилолмай қоламиз. Бизнинг сайловчиларга берган ваъдаларимиз бор. Бу ваъдаларни бажариш қуруқ гаплардан иборат бўлмаслиги керак. Уларни натижага айлантиришимиз керак. Натижага айлантириш осон иш эмас. Шунинг учун биз бугунги кунда тинганимиз йўқ, ҳаркатдамиз. Барча фаолиятимиз натижаларини эълон қилишга қаратилган. Натижа фақатгина ОАВдаги баёнот билан ёки ижтимоий тармоқлардаги ҳаракат билан кўринмайди. Натижага эришиб сайловчиларнинг ишончини оқлаш йўлида тиним билмай ҳаракат қилмоқдамиз.

Алишер Қодиров, «Миллий тикланиш» демократик партияси марказий кенгаши раиси