Saylovoldi jarayonlarda katta-katta va’dalar bergan partiya rahbarlari qayerda? Partiya rahbarlari javob beradi

O‘zbekistonda 2019-yilning dekabr oyida Oliy Majlis Qonunchilik palatasi va mahalliy Kengashlar deputatlarining saylovi bo‘lib o‘tgan edi. Saylovoldi jarayonlarda juda faol bo‘lib ko‘ringan partiya rahbarlari saylovdan so‘ng ijtimoiy faolligi susayib qolgandek ko‘rinmoqda. “Daryo” muxbiri Musulmonbek Ibrohimov partiya rahbarlarining ijtimoiy faolligi, xususan, voqea-hodisalarga o‘z munosabatini bildirib borish keskin kamayib ketgani xususida ulardan qisqacha intervyu oldi.

Partiyalar saylovoldi jarayonida do‘mbirani olib, taraqa-turuq qilib yurgan bo‘lsa, endilikda amaliy ish bilan shug‘ullanyapti.

Imkon boricha, nima ish qilinyotgani va nimalarga erishilayotgani haqida ijtimoiy tarmoqlarda yoritib borishga harakat qilinmoqda. Partiyamizning sayti va ijtimoiy tarmoqlarda kanallari bor. Media reja bo‘yicha saylovchilarimizga olib borilayotgan ishlar xususida axborot berib bormoqdamiz.

Mamlakat bo‘yicha 22 ta okrugdan saylangan bo‘lsak, har oyda butun respublika bo‘yicha bo‘lmasa ham, o‘zimizning okruglarga borib ishlayapmiz. Shuning uchun biz qilayotgan ishlar xalqqa va OAVga kam ko‘rinayotgandek.

Ulug‘bek Inoyatov, Xalq demokratik partiyasi markaziy kengashi raisi

Partiya rahbari sifatida faoliyat boshlaganimga hali hech qancha vaqt bo‘lgani yo‘q. Sizni har qanday sohada muvafaqqiyatga erishishingiz shu faoliyatdagi ishingizning ijobiy dinamikasiga bog‘liq. Agar ijobiy dinamikaga qarab harakat qilmaydigan bo‘lsangiz, demak sizning ishingiz natijasi ko‘rinmaydi. Aytaylik, meni lavozimga munosib ko‘rgan markaziy kengash, deputatlar va umuman, partiyadoshlar oldida ijobiy dinamika bilan ketmaydigan bo‘lsam, men o‘zimning obro‘mni yo‘qotib qo‘yaman. Bilasiz, obro‘ yillab misqollab yig‘iladi. Uni bir kunda yo‘qotib qo‘yishni xohlamayman. Mening e’tiqodim tabiatni o‘rganish, tabiatni asrash, bundan boshqa narsa emas. Harakat qilamanki, ishlarimiz ijobiy dinamikada ketadi.

Komiljon Tojiboyev, O‘zbekiston Ekologik partiyasi markaziy kengashi raisi

Saylovoldi jarayoni – talabchanlikni oshiradigan payt. Saylovga yaqin qolgach hamma bor kuchi bilan ko‘proq ovoz olishga harakat qiladi. Kerak bo‘lsa, va’dalar, har xil holatlarga munosabatlar beriladi.

Aslida ko‘p holatlarga biz munosabat bildirib boryapmiz, munosabat bor. Deputatlar faolligini oshirish uchun baribir ozroq vaqt kerak. Rais sifatida kerakli joyda kerakli tarzda fikrlarimizni bildirib boryapmiz.

Maqtanishdan yiroqmiz, lekin bir narsani tan olib aytish kerak: oldingi daraja bilan hozirgi darajani solishtiradigan bo‘lsa, bizning deputatlar e’tibori kuchliroq. Masalan, ilgari birorta deputat o‘z fikrini bildirib o‘tirmas edi, bor bo‘lsa ham juda oz edi. Hozir esa nafaqat bizning partiya deputatlari, balki boshqa partiya deputatlari ham har tomonlama juda faol: qilayotgan ishi bilan ham, bildirayotgan fikrlari bilan ham. Nazarimda, bu jihatdan partiyalar o‘sganini barcha tan olsa kerak. OAVlari bilan hamkorlik bo‘lgani, ular erkin bo‘lgani sababli bizning mana shunday ochiq gaplashishga imkonimiz bo‘lyapti.

Aktam Xaitov, O‘zLiDeP markaziy kengashi raisi

Butun dunyoda bo‘lgani kabi O‘zbekistonda ham barcha sohalar kabi, qaysidir ma’noda, partiyalar faoliyatiga ham ta’sir ko‘rsatgan bo‘lishi mumkin. Avvalgiga o‘xshab katta majlislar, OAV bilan ishlash ham chegaralangan. Lekin shuni aytib o‘tishim kerakki, boshqa partiyalarni bilmadim, “Adolat” sotsial-demokratik partiyasiga rais sifatida yaqinda saylangan bo‘lishimga qaramay, shu narsani guvohi bo‘lib turibmanki, ish jarayoni avvallari qanday ketgan bo‘lsa, shunday davom ettirishga harakat qilinmoqda. O‘sha masalalar, o‘sha jarayonlarni amalga oshirish bo‘yicha ishlar ketmoqda.

Qilinayotgan ishlarni PR qilish, OAVga olib chiqishda ba’zi bir kamchiliklar bo‘lishi mumkin va men buni tabiiy jarayon deb o‘ylayman. Birinchi imkoniyat bo‘lishi bilan hozir partiyalarning sustkashligi haqidagi fikrlarni bir chetga surib qo‘yadigan faoliyat boshlanib ketadi”.

Bahrom Abduhalimov, “Adolat” sotsial-demokratik partiyasi markaziy kengashi raisi

Saylovoldi jarayonlarni saylovdan keyin ham ana shunday davom etishiga imkoniyat yo‘q. Chunki saylov payti o‘z nomi bilan juda kuchli raqobat, ya’ni butun harkatlar maqsadga yo‘naltirilgan qisqa bir davr. U paytda hamma keskin faollashdi. Jurnalistlar ham, partiyalar ham o‘sha paytda juda faol bo‘ladi va xuddi shunday harakatning besh yil davom etishi bu imkonsiz. Ham moddiy nuqtayi nazardan, ham ijtimoiy nuqtayi nazardan bu narsani ta’minlab bo‘lmaydi.

Saylovchilarning noroziligi bu avvaldan yig‘ilib qolgan noroziliklar bilan bog‘liq. Jamoatchilikning partiyalardan norozi bo‘lishiga asos bor. Chunki partiyalar o‘tgan davrda yetarli darajada faol bo‘lmagan, saylovchilarni elektoratini oqlamagan. Mana shu kayfiyat hanuz saqlanib turibdi va ishonchim komilki, biz buni qisqa muddat ichida hal qila olmaymiz. Odamlarning ishonchini qozonish oson ish emas. Saylovdan keyingi qisqa bir davr uchun faoliyatimizga baho bersak, “yaxshi”dan pastroq deb baho bergan bo‘lardik. Lekin harakatlarimiz davom etmoqda.

Saylovdan keyin ishlash kerak. Agar ishlamasdan yana faollashib bayonotlar bilan yuraveradigan bo‘lsak, natija qilolmay qolamiz. Bizning saylovchilarga bergan va’dalarimiz bor. Bu va’dalarni bajarish quruq gaplardan iborat bo‘lmasligi kerak. Ularni natijaga aylantirishimiz kerak. Natijaga aylantirish oson ish emas. Shuning uchun biz bugungi kunda tinganimiz yo‘q, harkatdamiz. Barcha faoliyatimiz natijalarini e’lon qilishga qaratilgan. Natija faqatgina OAVdagi bayonot bilan yoki ijtimoiy tarmoqlardagi harakat bilan ko‘rinmaydi. Natijaga erishib saylovchilarning ishonchini oqlash yo‘lida tinim bilmay harakat qilmoqdamiz.

Alisher Qodirov, “Milliy tiklanish” demokratik partiyasi markaziy kengashi raisi