Қарши туман ҳокимининг хизмат хонасида мурожаатчи аёлларни «разбор» қилгани айтилган аёл журналист экани, шу ҳаракати сабаб ишдан бўшатилгани маълум қилинди

Қашқадарё вилоятининг Қарши тумани ҳокими Мақсуда Мустафоеванинг хизмат хонасида хайрия сифатида берилиб, кейин олиб қўйилган 100 миллион сўм ҳақида жамоатчиликни хабардор қилган мурожаатчи аёлни «разбор» қилган Умида исмли аёл блогер эмас, журналист экани маълум қилинди. Бу ҳақда «Дарё» мухбири хабар берди.

Таъкидланишича, бу ҳақда 29 январь, шанба куни бўлиб ўтган матбуот брифингида ҳоким ёрдамчиси Муқаддас Мирсаидова маълум қилган.

«Мана шу воқеалар ижтимоий тармоқларда тарқалиб кетганидан сўнг ўша Умида исмли, биз билан илгари ҳам ҳамкорликда ишлаган журналист аёл туманимизга келди ва муаммога биргалашиб ижобий ечим топайлик деди. Таҳдид учун эмас, ижобий ечим учун. Мана шу аёлларнинг масаласини ечиш учун. Шунинг учун келиб, у аёллар билан суҳбат уюштирди. Менинг айбим, ҳоким ёрдамчиси сифатидаги ваколатимдан фойдаланиб, ҳоким йўқ пайтда унинг хизмат хонасига уларни олиб кириб, иккита стулни ажратиб бердим. Буни инкор этмайман, албатта», — деди ҳоким ёрдамчиси Мусаддас Мирсаидова.

Ҳоким ёрдамчиси Мирсаидованинг гапи ҳокимликнинг ташкилий назорат гуруҳи раҳбари Нуриддин Қўлдошевнинг «ҳокимликка келган аёл блогер эди», деган гапини инкор этди.

Муқаддас Мирсаидовага юзланган журналист ва блогерлар ҳокимликка келиб, мурожаатчи аёлларни «разбор» қилган ва айни кунда бўшатилаётгани айтилган Умида исмли аёлнинг қайси нашрда фаолият юритишини сўради. Бироқ ҳоким ёрдамчиси Муқаддас Мирсаидова Мақсуда Мустафоеванинг қўл ишорасига кўра, журналист аёлнинг иш жойини ҳам ошкор қилмади.

Эслатиб ўтамиз, аввалроқ ҳоким Мақсуда Мустафоева йўқ пайтда унинг хизмат хонасига бемалол кириб, ҳаттоки фуқароларга босим ўтказишга журъат топган аёл ҳақида хабар берилганди. Қарши туман ҳокимлигининг ташкилий назорат гуруҳи раҳбари Нуриддин Қўлдошев мурожаатчи аёлларга руҳий босим ўтказиб, фуқарони ҳокимнинг хизмат хонасида «разбор» қилишга журъат топган аёлнинг исми Умида эканлигини ошкор қилганди.