2020 йилда Ўзбекистондаги IT-паркларнинг 5 та филиали ва 107 та рақамли технологиялар ўқув марказида 10 минг нафар ёш ўқитилди. Бу ҳақда 27 январь, чоршанба куни Президент Шавкат Мирзиёев раислигида ўтказилган йиғилишда маълум қилинди, дея хабар бермоқда «Дарё» мухбири.
Давлат раҳбарининг таъкидлашича, 2021 йилда «Бир миллион дастурчи» лойиҳаси доирасида 105 минг нафар ёш IT-технологиялар бўйича онлайн ўқитилади.
«Шу йил ҳар бир тумандаги камида биттадан мактабда информатикага ихтисослашган мактабларнинг IT-тўгарагини ташкил этиб, 50 минг нафар юқори синф ўқувчиларини жалб қиламиз. ‘Бир миллион дастурчи’ лойиҳаси доирасида эса 2 мингдан ортиқ мактабнинг 50 минг нафар ўқувчиси ҳамда 44 та олий ўқув юртининг 55 минг нафар талабаси IT-технологиялар бўйича онлайн ўқитилади.
Шунингдек, йил давомида яна 100 та рақамли технологиялар ўқув маркази ташкил этилиб, 20 минг нафар ёшнинг дастурлаш ва ахборот технологиялари соҳасида инновацион тадбиркорликка ўқитиш йўлга қўйилади», — деди Шавкат Мирзиёев.
Президент мазкур режаларни амалга ошириш бўйича масъул вазирликлар раҳбарларига топшириқ берди.
Мавзуга доир:
- Наманганда бир кунда 12 та IT-School ўқув мактаби очилди
- Ўзбекистонда ўқувчиси «Бир миллион дастурчи» курсини муваффақиятли якунлаган мактаб ўқитувчиларини мукофотлаш йўлга қўйилади
- Ўзбекистон мактабларида 5-синфдан бошлаб ўқитилаётган информатика фани такомиллаштирилади
- «Бу ишларни келгуси 2-3 йилда тўлиқ амалга оширмасак, ҳар бир кечиккан йилимиз мамлакатимизни 10 йил орқага тортади» — Шавкат Мирзиёев IT’ни ривожлантириш ҳақида
Изоҳ (0)