Олий ва ўрта махсус таълим вазири ўринбосари Узоқбой Бегимқулов Қарши давлат университети ректорига бакалавр дипломига эга 8 нафар талабани магистратурага қабул қилиш ҳақида топшириқ берди. Бироқ вазирлик ушбу топшириқ қонуний эканлигини асослай олмади, дея хабар берди «Дарё» мухбири.
Вазирликнинг ушбу топшириғи сабаб адолатсизликка учраганини айтаётган университет талабаси Зарина Итолмасова масъулларга бунинг изоҳини сўраб, қайта-қайта мурожаат қилганини, бироқ асосли жавоб эшитмаганини билдирди.
«2020 йил Қарши давлат университетининг хорижий тиллар факультетини тамомлаб, бакалавр дипломини олдим ва шу йили магистратурага ҳужжат топширдим. Тестдан 179,11 балл олиб, йиқилганлар орасида учинчиликни эгалладим. Мутахассислик фанимдан 55 фоиздан юқори балл тўплаганим учун ҳуқуқий ҳужжатларда кўрсатилганидек, қўшимча контракт учун ҳужжат топширдим. Йиқилганлар орасида мендан юқорида турган икки нафар талабанинг балли менинг баллимга нисбатан юқори бўлгани учун баллар кетма-кетлигига кўра улар қабул қилинди. Шундан сўнг келаси йил топшираман деб, тайёргарликни бошлаб юбордим.
Кейинчалик эшитсам, бизнинг йўналишимиз бўйича яна 2 та қўшимча ўрин берилган. Тезда университетга етиб бордим ва қўшимча ўрин берилганини, мен рўйхат бошида турганимни айтдим. Билсам, мендан паст балл тўплаган ва балли етмай йиқилганлар рўйхатида ҳам энг қуйида турган талабалар қабул қилинган. Университет ректорига учрашиб, адолатсизлик бўлганини айтдим. Ректор қўшимча ўринга кириши лозим бўлган талабалар исм-шарифи билан вазирликдан айтилганини, шунинг учун бошқа талабалар қабул қилинганини билдирди. Вазирликка мурожаат қилдик. Улар эса университетга хат юбориб, қонунийлик таъминласин ва биз шу талабанинг, яъни мени назарда тутиб, магистратурага киришига қарши эмасмиз деган мазмунда хат берди. Ректор эса бу хат мени ўқишга қабул қилиш учун асос бўлолмаслигини, вазирлик 8 нафар талабани қабул қилиш учун қандай топшириқ берган бўлса, худди шу мазмунда хат бериши лозимлигини айтди», — дейди Зарина Итолмасова.
Зарина Итолмасованинг қўшимча маълумот беришича, куни кеча шу йўналишга яна қўшимча бир ўрин берилган. Ва бу сафар ҳам балли паст, рўйхатда энг қуйида турган талаба магистратурага қабул қилинган.
«Бу адолатсизлик-ку, деб университетда шу ишга масъул бўлган илмий котиб Исмоил Йўлдошевга мурожаат қилдим. У киши бу ўрин ҳам вазирлик томонидан юборилганини айтиб, бу сир эканлигини, сирни эса менга айтолмаслигини билдирди», — дейди адолатсизликка учраётганини айтаётган талаба.
«Дарё» мухбири билан суҳбатлашган яна бир талаба Умар Ғойипов ҳам вазирликнинг ими-жимидаги ҳаракати унга ҳам таъсир қилаётганини билдирди.
«2020 йил бакалаврни тамомлаб, магистратурага ҳужжат топширдим. 179,9 балл билан йиқилганлар орасида тўртинчи ўринда турибман. Бироқ университет раҳбарияти қўшимча контракка рўйхат асосида эмас, саралаб олиб қабул қилди. Бу саралаш сабабини сўрасак, вазирликдан шундай топшириқ бўлган дейишди. Ваҳоланки, агар имтиёз берилса, менга ўхшаган ота-онаси ногирон ва муҳтожлиги борларга имтиёз берилмайдими? Вазирлик қайси ҳужжатга асосланиб, бундай адолатсизликка қўл урди?», — дейди Умар Ғойипов.
Талабалар айтаётган мазкур адолатсизликни изоҳлаган Қарши давлат университети ходими, айнан шу ишга масъул Исмоил Йўлдошев вазирлик хати вазир ўринбосари Узоқбой Бегимқулов имзоси билан тақдим этилганини айтиб, хат ХФУ шаклида — яъни хизмат фаолияти учун юборилганини билдирди. Ҳамда хатдан нусха тақдим этолмаслигини билдирди.
«Хорижий тиллар факультетининг магистратурасига қабул қилинган дастлабки икки нафар талаба баллар кетма-кетлигига кўра, қабул қилинган. Аммо кейин қабул қилинган 3 нафар талаба эса мурожаатчи талабаларга нисбатан паст балл тўплаган бўлса-да, вазирлик хатига кўра ўқишга олинган. Вазир ўринбосари Узоқбой Бегимқулов имзоси билан юборилган хатда исм-шарифлари кўрсатилган талабалар Ўзбекистон Республикаси таълим муассасаларига қабул қилиш бўйича давлат комиссиясига ариза билан мурожаат қилган ва шунга асосланиб, вазирлик рўйхатига киритилган», — дейди Исмоил Йўлдошев.
Суриштирувлардан аниқланишича, вазир ўринбосари имзоси қўйилган 01—07/ 1— 1400-сонли хат 2020 йил 11 декабрь куни университет ректорига юборилган бўлиб, унда А.Йигиталиев, Ш.Раззоқова, М.Норқобилова, Ғ.Ўралов, Э.Хушвақтов, М.Каримова, С.Муродова, Б.Раҳмоновларни магистратурага қабул қилиб, расмийлаштириш сўралган.
Олий ва ўрта махсус таълим вазирлиги ахборот хизмати раҳбари Фарҳод Бабашев «Дарё» мухбирининг «Вазир ўринбосарининг университет ректорига йўлланган хатига нега айнан 8 нафар исм-шариф кўрсатилган? Нега баллар кетма-кетлигига риоя қилинмаган? Вазирлик буни қандай асослайди?», дея берган саволларига масъуллар билан гаплашиб, маълумот беришини айтди. Бироқ айтилган фурсат ўтса-да, тайинли жавоб бермади.
Фарҳод Бабашев ҳам вазирлик хатида исм-шарифи кўрсатилганлар паст балл тўплаган бўлса-да, таълим муассасаларига қабул қилиш бўйича давлат комиссиясига ариза билан мурожаат қилганини, вазирлик хатига давлат комиссиясидан келган ҳужжат асос бўлганини айтиш билан кифояланди. Бироқ давлат комиссиясидан вазирликка берилган ва ректорга топшириқ беришга асос бўлган ҳужжат номи ҳам, ўзи ҳам ошкор қилинмади.
Шу ўринда савол туғилади. Хўш, давлат комиссиясига фақат шу 8 нафар талаба ариза билан мурожаат қилганми? Нега вилоят бўйича шу 8 нафар талаба исм-шарифи вазирлик хатида тилга олинди? Агар магистратурага қабул қилиш давлат комиссиясига шунчаки ариза ёзиш билан ҳал қилинадиган бўлса, унда юқори балл тўплаганлар давлат комиссиясига мурожаат қилса-да, нега қабул қилинмаган?
Янги вазир Абдуқодир Тошқулов вазирликнинг ахборот хизмати жавоб беролмаган саволга эътибор қаратиб, тайинли асос кўрсатади ёки адолатсиз бўлган бўлса, адолатнинг қарор топишида ташаббус кўрсатади деган умиддамиз.
Изоҳ (0)