Туркия Республикасининг Aksa energy компанияси Бухорода Aksa energy Bukhara иссиқлик электр станциясини қуради. Бу ҳақда «Дарё»га вилоят ҳокимлиги ахборот хизмати раҳбари Олим Жўраев хабар берди.
Таъкидланишича, Aksa energy Bukhara иссиқлик электр станцияси лойиҳа менежерлари — Мурад Устел ва Алган Сарачўғли Бухорога келиб, 270 мегаватт кучланишга эга иссиқлик электр станцияси қурилишига инвестиция киритмоқчилигини маълум қилган.
«Лойиҳа қиймати 150 миллион долларга молиялаштирилаётган Aksa energy Bukhara компанияси раҳбарлари Бухоро ҳокими қабулида бўлиб, вилоят раҳбарининг мазкур лойиҳа ҳақидаги фикри билан қизиқди», — дейди Олим Жўраев.
Олим Жўраевнинг айтишича, мазкур лойиҳа вилоят раҳбари томонидан қўллаб-қувватланган.
«Шу муносабат билан туркиялик сармоядорларга Бухоро туманидан 6 гектар ер майдони таклиф қилинди. Танланган ерда иссиқлик электр станцияси барпо этиш учун дастлабки инфратузилма — муҳандислик-коммуникация тармоқлари, жумладан, 20 километр масофадан табиий газ, 5 километр масофадан сув қувурларини тортиб келишга қарор қилинди», — дейди вилоят ҳокими матбуот котиби.
Изоҳ (0)