Тошкентда 2020 йилнинг декабрь ойи охирларида янги газ тақсимлаш тармоғи қурилиши бошлангани ҳақида хабар берилган эди. «Ҳудудгазтаъминот» матбуот хизматининг маълум қилишича, қурилиш ишлари якунланмоқда.
Хабарда айтилишича, ушбу объектнинг қурилиши, аввало, мавжуд газ тақсимлаш тизими инфратузилмасини кенгайтириш зарурати билан боғлиқ бўлиб, бу ўз навбатида пойтахтнинг меъморий қиёфасини яхшилаш билан бир қаторда, янгидан янги турар жой массивларини лойиҳалаштириш ҳамда қўшимча ишлаб чиқариш қувватларини яратишга ёрдам беради.
Диаметри 1020 мм ва узунлиги қарийб 8 километрни ташкил этувчи янги газ тақсимлаш тармоғи 13 та автомобиль йўли ва 2 та коллекторни кесиб ўтади. Сергели туманидаги қурилиш майдончасига 7930 метр қувур етказиб берилиб, шундан бугунги кунга қадар 6100 метр қувурларни ўрнатиш ишлари якунланди.
Объектдаги қурилишга 80 га яқин мутахассис ва 22 та махсус техника жалб қилинган бўлиб, барча иш жараёнлари «Ҳудудгазтаъминот»нинг махсус штаби томонидан назорат қилинмоқда.
«Газ тақсимлаш тармоғининг фойдаланишга топширилиши пойтахтимиз ягона газ тармоғи ҳалқасини яратиш ва бунинг натижасида истеъмолчиларга барқарор табиий газ етказиб беришни таъминлайди, хусусан, Чилонзор, Учтепа, Яккасарой, Миробод ва Шайхонтоҳур туманларининг табиий газ таъминотини тубдан яхшилаш имконини беради», — дейилади хабарда.
Маълумот учун, бугунги кунда Тошкентда 671 мингдан зиёд жисмоний ва 13 мингга яқин улгуржи истеъмолчилар мавжуд бўлиб, уларга 2021 йилда 4 миллиард метр кубдан зиёд табиий газ етказиб берилган, бу ўтган 2019 йилга нисбатан 10 фоизга кўп.
Эслатиб ўтамиз, 2020 йил 16 декабрь куни Президент Шавкат Мирзиёев бошчилигида ўтказилган видеоселектор йиғилишида давлат раҳбари электр энергияси, табиий газ ва кўмир таъминоти масалаларига ҳам тўхталиб ўтганди. Таъкидланишича, Ўзбекистонда бугунги кунда газ таъминотида суткасига 20 миллион метр куб танқислик мавжуд.
Изоҳ (0)