АҚШ вице-президенти Майк Пенс амалдаги президент Дональд Трампни ҳокимиятдан четлатиш имконини берадиган мамлакат конституциясининг 25-тузатишини қўллаш ниятида эмас. Бу ҳақда Business Insider ва The New York Times’га таяниб, «РБК» хабар берди.
Аввалроқ демократлар, хусусан, вакиллар палатаси спикери Нэнси Пелоси ва демократларнинг сенатдаги етакчиси Чак Шумер шу каби ташаббус билан чиққан эди.
NYT’нинг ёзишича, Пенснинг тузатишни қўлламаслик борасидаги қарорини Трампнинг кабинетидаги бир нечта амалдор қўллаб-қувватлаган. Нашр маълумотларига кўра, улар бу каби ҳаракат Вашингтондаги вазиятни янада мураккаблаштиради деб ҳисобламоқда.
Ҳозирча Пенс ўз позицияси ҳақида конгрессга қачон билдириш бериши номаълум.
Мазкур ҳолатдан бир неча соат олдин Пелоси Трампни президентлик ваколатидан муддатидан олдин маҳрум қилиб, мамлакат бошқарувини вақтинча Пенснинг қўлига топширишга чақирган эди. Конституциянинг 25-тузатишига кўра, вице-президент ҳукумат аъзоларининг розилиги билан ўзига президентлик ваколатларини юклай олади.
Сенатдаги демократлар етакчиси Чак Шумер ҳам Трампни четлатиш таклифини билдирган. Унинг сўзларига кўра, агар 25-тузатиш қўлланилмаса, конгресс президентга импичмент эълон қилиш учун йиғилиши керак бўлади.
6 январь куни Дональд Трампнинг тарафдорлари соқчилар занжирини ёриб ўтиб, Вашингтондаги АҚШ Конгресси биносига бостириб кирди. Улар президент сайловлари натижаларини тасдиқлашга бағишланган конгресс мажлисини тўхтатиб қўйди. Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилинди, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлгани айтилмоқда. Кейинроқ АҚШ Конгресси Жо Байденнинг президент сайловидаги ғалабасини тасдиқлаган.
Изоҳ (0)