Хоразм вилоятининг Хива шаҳри Исломхўжа кўчасида жойлашган хонадонларнинг бирида 8 январь куни соат 3:41 да газ портлади. Бу ҳақда Фавқулодда вазиятлар вазирлиги матбуот хизмати хабар бермоқда.
Қайд этишларича, «уйда сизиб чиққан табиий газ ва ҳаво аралашмаси натижасида чақнаш содир бўлиб», яшаш уйининг деворлари ва томи қулаган ҳамда уйнинг 70 квадрат метр майдонида том бостирмасида ёнғин содир бўлган.
Воқеа жойида олиб борилган қидирув ишлари натижасида соат тахминан 4:50 да хонадон эгасининг қизи (2005 йилда туғилган) жасади бино уюмлари орасидан олиб чиқилган. Ёнғинда уй эгаси Ш.Э.нинг юзи, қўллари 22 фоиз термик куйиб, шифохонага ётқизилган.
«Табиий газдан фойдаланиш қоидаларининг бузилиши чақнашнинг асосий сабаби деб тахмин қилинмоқда», — дея қўшимча қилинган ФВВ ахборотида. Қайд этишларича, Хоразм вилояти ҳокими Фарҳод Эрманов, ИИБ, ФВБ, ССБ ва бошқа тегишли идоралар вакиллари воқеа жойида бўлиб турибди.
Қайд этиш жоиз, бу 2020—2021 йилги куз-қиш мавсумида Ўзбекистонда газ портлаши оқибатида уйларнинг вайрон бўлиб, одамлар қурбон бўлиши билан боғлиқ дастлабки ҳолат эмас. Аввалроқ, 6 январь куни Қарши шаҳрида, 30 ноябрь куни Тошкент вилоятининг Янгийўл туманида, 21 ноябрь куни Қибрай туманида газ портлаши оқибатида уйлар вайрон бўлган, ҳар учала воқеа оқибатида икки нафардан фуқаро (жами олти киши) вафот этган эди.
Маълумот учун, Ўзбекистонда ис гази чақнаши, ис газидан заҳарланиш, ҳаво-газ аралашмаси чақнаши билан боғлиқ ҳолатлар 2020 йилда 2019 йилга нисбатан 22 фоизга кўпайган. Президент Шавкат Мирзиёев «ис гази ва чақнашлар билан боғлиқ нохуш ҳолатларнинг ортиб бораётгани ҳар бир раҳбарни ўйлантириши керак»лигини алоҳида таъкидлаган эди.
Изоҳ (0)