Хитой олимлари томонидан ишлаб чиқилган коронавирусга қарши рекомбинант вакцинанинг 3-босқич синовларида кўнгилли сифатида иштирок этиш учун ариза берган ўзбекистонликларнинг 30 фоизида коронавирусга қарши антитаналар борлиги аниқланди. Бу ҳақда Ўзбекистон инновацион ривожланиш вазири Иброҳим Абдураҳмонов «Дарё»га берган интервьюсида маълум қилди.
Вазирнинг сўзларига кўра, 18 декабрдан 6 январгача вакцина синовида кўнгилли сифатида иштирок этиш истагини билдирган 3 минг нафар фуқаро кўрикдан ўтказилган ва улардан фақат 1 270 нафари — «ҳеч бирида шубҳали касалликлари йўқ» кўнгиллилар «ўз хоҳиш ва розиликлари билан, тадқиқот шартномаси имзо қўйиб», эмланган. Маълумот учун, Хитой томони Ўзбекистондаги синовлар учун 5 минг доза вакцина тақдим этган.
Вакцина олиш истагидаги фуқароларнинг ҳар бири билан суҳбатлашиб, уларнинг касаллик тарихи, психологик ҳолати ўрганиляпти. Мурожаат қилаётган кўнгиллилар биринчи куни тиббий кўрикдан ўтказилиб, коронавирусга тест олиняпти, антитаналари текширилмоқда. Иккинчи куни эмланяпти.Маълумот учун, Ўзбекистон Соғлиқни салқаш вазирлиги ҳисоб-китоблари бўйича мамлакатда 6 январь ҳолатига кўра расман 77 412 кишида коронавирус инфекцияси аниқланган, шу вақтгача уларнинг 75 759 нафари (ёки 98 фоизи) соғайган, 615 нафари вафот этган.Кўнгиллилар билан суҳбат чоғида фуқаролардан тиббий ҳолатлари тўғрисида маълумот олинади, хусусан, аввал COVID-19 касаллигига чалинган-чалинмагани сўралади — коронавирус билан оғриган кишиларда синов ўтказилмайди. Шу суҳбат жараёнининг ўзида тахминан 10 фоиз кўнгилли эмлашдан воз кечмоқда ёки тиббий кўрсатмаларга кўра уларнинг вакцина олиши рад этилмоқда.
Суҳбатдан ўтган мурожаатчилардан қон таҳлили олинади. Шу босқичда қон таҳлили топширганлардан тахминан 30 фоизининг организмида коронавирусга қарши антитаналар борлиги аниқланмоқда. Булар коронавирусни ўзи билмаган ҳолда, аломатларсиз енгиб ўтган шахслар ҳисобланади. Улар соғлом бўлишига қарамай, эмланишга жалб қилинмаяпти. Чунки бу вакцина самарасини текширишга халал беради.
Тиббий кўрикдан ўтиб, вакцина олишга лойиқ, деб топилганларга яна бир бор қайта ўйлаб кўришлари учун бир кун имконият беряпмиз — ҳеч ким уларни эмланишга мажбур қилмайди. Ҳозиргача 10 фоиз кўнгилли иккиланган ҳолда эмланишдан воз кечди.
Иброҳим Абдураҳмонов, Ўзбекистон инновацион ривожланиш вазири
Айни вақтда, Соғлиқни сақлаш вазирлиги расмийлари ҳам, ҳукуматнинг бошқа идоралари мансабдорлари ҳам Ўзбекистонда COVID-19 билан боғлиқ ҳақиқий ҳолат расмий статистикадаги рақамлардан бир неча баробар катта бўлиши мумкинлигини таъкидлайди.
Қайд этиш жоиз, аввалроқ ССВ ҳузуридаги коронавирусга қарши кураш штаби аъзоси, профессор Нурмат Отабеков Ўзбекистонда аҳолининг 70 фоизида коронавирусга қарши иммунитет шаклланса, «пандемияни енгишимиз» мумкинлигини маълум қилган эди.
Изоҳ (0)