AQSh vitse-prezidenti Mayk Pens amaldagi prezident Donald Trampni hokimiyatdan chetlatish imkonini beradigan mamlakat konstitutsiyasining 25-tuzatishini qo‘llash niyatida emas. Bu haqda Business Insider va The New York Times’ga tayanib, “RBK” xabar berdi.
Avvalroq demokratlar, xususan, vakillar palatasi spikeri Nensi Pelosi va demokratlarning senatdagi yetakchisi Chak Shumer shu kabi tashabbus bilan chiqqan edi.
NYT’ning yozishicha, Pensning tuzatishni qo‘llamaslik borasidagi qarorini Trampning kabinetidagi bir nechta amaldor qo‘llab-quvvatlagan. Nashr ma’lumotlariga ko‘ra, ular bu kabi harakat Vashingtondagi vaziyatni yanada murakkablashtiradi deb hisoblamoqda.
Hozircha Pens o‘z pozitsiyasi haqida kongressga qachon bildirish berishi noma’lum.
Mazkur holatdan bir necha soat oldin Pelosi Trampni prezidentlik vakolatidan muddatidan oldin mahrum qilib, mamlakat boshqaruvini vaqtincha Pensning qo‘liga topshirishga chaqirgan edi. Konstitutsiyaning 25-tuzatishiga ko‘ra, vitse-prezident hukumat a’zolarining roziligi bilan o‘ziga prezidentlik vakolatlarini yuklay oladi.
Senatdagi demokratlar yetakchisi Chak Shumer ham Trampni chetlatish taklifini bildirgan. Uning so‘zlariga ko‘ra, agar 25-tuzatish qo‘llanilmasa, kongress prezidentga impichment e’lon qilish uchun yig‘ilishi kerak bo‘ladi.
6-yanvar kuni Donald Trampning tarafdorlari soqchilar zanjirini yorib o‘tib, Vashingtondagi AQSh Kongressi binosiga bostirib kirdi. Ular prezident saylovlari natijalarini tasdiqlashga bag‘ishlangan kongress majlisini to‘xtatib qo‘ydi. Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilindi, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda. Keyinroq AQSh Kongressi Jo Baydenning prezident saylovidagi g‘alabasini tasdiqlagan.
Izoh (0)