Donald Tramp yaqin ikki hafta davomida, ya’ni prezidentlik lavozimi tugagunga qadar Facebook va Instagram’da bloklanadi. Bu haqda Facebook asoschisi Mark Sukerberg ma’lum qildi.
Foto: Reuters
“So‘nggi bir necha yil ichida biz prezident Trampga platformamizdan siyosatimizga muvofiq foydalanishga ruxsat berdik, ba’zida bizning siyosatimizga xilof bo‘lgan kontent yoki postlarni olib tashladik.
Biz buni jamoatchilik siyosiy bayonotlarga, hatto munozarali bayonotlarga imkon qadar kengroq kirish huquqiga ega ekaniga ishonganimiz uchun qildik. Ammo hozir vaziyat tubdan farq qiladi. Bu vaziyat platformamizni demokratik yo‘l bilan saylangan hukumatga qarshi qo‘zg‘olon qo‘zg‘atish uchun ishlatilishi bilan bog‘liq hisoblanadi”, – deb yozgan Sukerberg.
Facebook asoschisining so‘zlariga ko‘ra, Trampga ushbu davrda xizmatlardan foydalanishda davom etishiga yo‘l qo‘yib berish katta xavfni yuzaga keltiradi.
Eslatib o‘tamiz, AQShda 3-noyabr kuni bo‘lib o‘tgan prezident saylovlari natijalarini saylovchilar hay’ati 15-dekabr kuni qo‘llab-quvvatlab, demokratlardan nomzod Jo Baydenni g‘olib deb e’lon qildi. Kongress yakunlarni 6-yanvar kuni tasdiqlashi kerak edi. Bunga saylovda mag‘lub bo‘lgan prezident Donald Trampning tarafdorlari xalaqit berdi: ular Kongress binosi yonida yig‘ilib, ichkariga bostirib kirdi. Politsiya ularni faqat kuch bilan quvib chiqara oldi.
Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilinib, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda.
Mavzuga doir:
Shundan so‘ng Facebook va Instagram Trampni 24 soatga, Twitter esa 12 soatga bloklab qo‘ydi. Keyinroq 7-yanvar kuni AQSh Kongressi majlisini davom ettirib, Jo Baydenning AQShning 46-prezidenti etib saylanganini tasdiqladi va uning inauguratsiyasini 20-yanvarga belgiladi.
