Смартфонлар «кушандаси» 2020 йилнинг энг мустаҳкам модели номини эълон қилди

Роликларида смартфонларни «қийнаш» билан танилган Зак Нельсон исмли блогер 2020 йилнинг энг мустаҳкам моделлари номини эълон қилди, деб хабар беради IXBT.

Одатда Нельсон мобил бозорда сотувга чиққан янги қурилмаларни тирнайди, букади ва ҳатто олов билан қайта ишлайди.

Шундай қилиб, Нельсон 2020 йилнинг энг мустаҳкам смартфони номини Google Pixel 4а моделига берган. «Энг нозик смартфон» дея эса OnePlus Nord эътироф этилган.

Google Pixel 5 смартфони энг таъмирбардош смартфонга айланган. Шунингдек, у энг «ёлғончи» смартфон ҳам ҳисобланади — бунга унинг металл корпуси сабаб бўлган.

«Таъмирлаш қийин бўлган смартфон» номи BlackShark 3’га насиб этган. Энг «инновацион» қурилма — ZТЕ Axon 20 — у селфи-камераси экран остида жойлашган бозордаги биринчи смартфон ҳисобланади. «Энг чиройли смартфон» номи эса iPhone 12 Pro Max’га берилди.