Илк йўловчи: Шавкат Мирзиёев ерусти метросининг янги Сергели йўналишини кўздан кечирди (фото)

Тошкентда 2020 йил Мустақиллик байрами арафасида Тошкент ерусти метросининг биринчи босқичи битказилган эди. Лойиҳани лойиҳалаштириш 2017 йилда бошланган. Қурилишнинг бориши давлат раҳбарининг эътиборида бўлган. Август ойининг охирида ушбу ерусти ҳалқа метросининг биринчи босқичи битказилиб, Президент Шавкат Мирзиёев 29 август куни бу ерга ташриф буюриб, жамоатчилик билан бирга поездда юрган эди.

26 декабрь куни ерусти метросининг яна бир муҳим бўғини – Сергели йўналиши ишга туширилди. Президент Шавкат Мирзиёев ушбу транспорт объектини бориб кўрди. Шу ерда давлат ва жамоат ташкилотлари, оммавий ахборот воситалари вакиллари билан мулоқот бўлди. «Дарё» мухбири Сергели йўналишининг ишга туширилиш жараёнига гувоҳ бўлиб, ушбу тадбирнинг эътиборга лойиқ лаҳзаларини кадрларга муҳрлади.

Маълумот учун, Сергели метро линиясида дастлабки рельсларни ўрнатиш ишлари шу йилнинг июнь ойида бошланган. Белгиланган лойиҳага асосан Сергели йўналишининг умумий узунлиги 6,94 километр бўлиб, қуриш ишлари 2016 йилнинг декабрида бошланган, у 2020 йилнинг кузида фойдаланишга топширилиши лозим бўлган. Лойиҳага кўра, метрополитеннинг янги йўналиши «Чоштепа», «Тошкент ҳалқа йўли», «Сергели», «Афросиёб», «Қипчоқ» ва «Чинор» номларига эга бўлиши керак эди. Бироқ кейинроқ унга ўзгартириш киритилиб, станцияларнинг номи рақамланганига гувоҳ бўлиш мумкин. 

Бекатлар ва уларнинг оралиғида белгиланган режа бўйича «Кўприкқурилиш трести» унитар корхонасининг тажрибали мутахассислари томонидан бунёдкорлик ишлари амалга оширилган. Қурилиш ишларида 60 та замонавий техника ва механизмлардан фойдаланилган, 700 дан ортиқ мутахассислар 2 сменада ишлагани айтилган эди.