Ilk yo‘lovchi: Shavkat Mirziyoyev yerusti metrosining yangi Sergeli yo‘nalishini ko‘zdan kechirdi (foto)

Toshkentda 2020-yil Mustaqillik bayrami arafasida Toshkent yerusti metrosining birinchi bosqichi bitkazilgan edi. Loyihani loyihalashtirish 2017-yilda boshlangan. Qurilishning borishi davlat rahbarining e’tiborida bo‘lgan. Avgust oyining oxirida ushbu yerusti halqa metrosining birinchi bosqichi bitkazilib, Prezident Shavkat Mirziyoyev 29-avgust kuni bu yerga tashrif buyurib, jamoatchilik bilan birga poyezdda yurgan edi.

26-dekabr kuni yerusti metrosining yana bir muhim bo‘g‘ini – Sergeli yo‘nalishi ishga tushirildi. Prezident Shavkat Mirziyoyev ushbu transport obyektini borib ko‘rdi. Shu yerda davlat va jamoat tashkilotlari, ommaviy axborot vositalari vakillari bilan muloqot bo‘ldi. “Daryo” muxbiri Sergeli yo‘nalishining ishga tushirilish jarayoniga guvoh bo‘lib, ushbu tadbirning e’tiborga loyiq lahzalarini kadrlarga muhrladi.

Ma’lumot uchun, Sergeli metro liniyasida dastlabki relslarni o‘rnatish ishlari shu yilning iyun oyida boshlangan. Belgilangan loyihaga asosan Sergeli yo‘nalishining umumiy uzunligi 6,94 kilometr bo‘lib, qurish ishlari 2016-yilning dekabrida boshlangan, u 2020-yilning kuzida foydalanishga topshirilishi lozim bo‘lgan. Loyihaga ko‘ra, metropolitenning yangi yo‘nalishi “Choshtepa”, “Toshkent halqa yo‘li”, “Sergeli”, “Afrosiyob”, “Qipchoq” va “Chinor” nomlariga ega bo‘lishi kerak edi. Biroq keyinroq unga o‘zgartirish kiritilib, stansiyalarning nomi raqamlanganiga guvoh bo‘lish mumkin. 

Bekatlar va ularning oralig‘ida belgilangan reja bo‘yicha “Ko‘prikqurilish tresti” unitar korxonasining tajribali mutaxassislari tomonidan bunyodkorlik ishlari amalga oshirilgan. Qurilish ishlarida 60 ta zamonaviy texnika va mexanizmlardan foydalanilgan, 700 dan ortiq mutaxassislar 2 smenada ishlagani aytilgan edi.