Мармелад кўринишидаги болалар витаминлари фойдадан кўра кўпроқ зарар келтириши мумкин. Бу ҳақда “Газета.Ру” нашрига болалар эндокринологи Даря Хайкина маълум қилди.
Бундай витаминлар кўриниши ёрқин рангли, таъми ширин, қулупнай ёки манго ифорли бўлади. Мармеладларни эса сув билан ичишга ҳожат йўқ. Шу сабабли болалар уларни жуда яхши кўради.
Шунинг учун “витаминни болага қандай берсам экан” деган савол туғилмайди, боланинг ўзи ширин мармеладни талаб қила бошлайди. Аммо бундай қулайлик ортида турли алдовлар яширинган бўлади, чунки мармелад шаклидаги витаминларда таъмдан бошқа ҳеч қандай фойда йўқ”, дейди шифокор.
Эндокринологнинг таъкидлашича, чайналадиган витаминларнинг асосий муаммоларидан бири уларнинг таркибидаги шакар миқдоридир. Кўплаб ишлаб чиқарувчилар ширин таъм берувчилар билан чекланмайди, балки аксинча, мармеладларга глюкоза сиропи, шакар ва сунъий таъм берувчилар ҳам қўшади.
“Атиги 2–3 дона витаминда 5 граммгача шакар бўлади. Агар бундай витаминлар ҳар куни қабул қилинса, йилига деярли 2 кг қўшимча шакар йиғилади. Кўпчилик ота-оналар фарзандига шакар бермаяпман деб ўйлайди, лекин мармеладли витаминларда шакар оддий конфетдан ҳам кўпроқ бўлади”, дейди шифокор.
Шунингдек, бундай витамин дозасига қатъий риоя қилиш ҳам муҳим. Аммо кўплаб болалар, табиийки, бир дона мармелад билан чекланишни истамайди. Витаминлар миқдорининг кўпайиши эса ёғда эрувчи витаминлар (А, Д, Э ва К) туфайли хавф туғдиради. Чунки улар организмда тез тўпланади ва ортиқча миқдор заҳарланишга олиб келади. Бундан ташқари, мармеладли витаминларда капсула ёки суюқ кўринишдаги турларга қараганда кўпинча дозаси паст бўлади.
Яна бир муҳим жиҳат: шакар айрим витаминларнинг ўзлаштирилишини камайтиради. Масалан, C ва Д витаминлари шакар билан ёмонроқ сўрилади. Шунингдек, ортиқча шакар B гуруҳи витаминлари, айниқса бола ўсиши ва ривожланишида муҳим рол ўйнайдиган B1 (тиамин) етишмовчилигини кучайтириши мумкин.
Изоҳ (0)