Самарқанд вилояти ҳокимининг 12 нафар ўринбосаридан тўрт нафари янгиланди. Бу ҳақда 5 август куни ҳокимлик ахборот хизмати хабар берди.
Маълум қилинишича, Шербек Бўронов Самарқанд вилояти ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари — иқтисодиёт ва молия бош бошқармаси бошлиғи лавозимига тайинланган. Унинг мутахассислиги иқтисодчи. Депутатлик қилган, Нарпай ҳокими лавозимида ишлаган. Ҳозиргача мазкур лавозимда Феруз Абидов ишлаб келган.
Наврўз Раҳмонов вилоят ҳокимининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари вазифасига қўйилган. Бунгача Раҳмонов вилоят ҳокими ўринбосари котибияти мудири эди. Янги ўринбосардан аввал мазкур лавозимда Акмал Шукуров ишлаб келган.
Бугун Ургут тумани ҳокими вазифасидан озод этилган Ботир Жабборов Самарқанд вилояти ҳокимининг қишлоқ ва сув хўжалиги масалалари бўйича ўринбосари — Қишлоқ хўжалиги бошқармаси бошлиғи лавозимида иш бошлади. Ушбу вазифада ишлаган Шунқор Худойбердиев Пайариқ туманига ҳоким этиб тайинланган.
Шу билан бирга, вилоят ҳокимининг ўринбосари — вилоят инвестициялар ва ташқи савдо бошқармаси бошлиғи ҳам ўзгарди. Ушбу лавозимга шу пайтгача Ўзбекистоннинг Ҳиндистондаги элчихонаси Савдо-иқтисодий масалалар бўйича маслаҳатчиси бўлган Хуршидбек Самиев тайинланди.
Аввал Самарқанд вилояти ҳокимининг биринчи ўринбосари, кейинчалик Республика савдо-саноат палатаси раҳбари ўринбосари бўлиб ишлаган Жамшид Ўроқов Самарқанд вилоят ҳокимининг маҳаллий саноатни ривожлантириш масалалари бўйича ёрдамчиси вазифасида иш бошлади.
Ҳозирча Самарқанд вилояти ҳокимлиги расмий сайтида янги тайинланган ҳоким ўринбосарлари тўғрисида маълумот жойланмаган. Сайтдаги маълумотларга қараганда, вилоят ҳокимининг 12 нафар ўринбосари мавжуд.
Изоҳ (0)