Шавкат Мирзиёев 26 декабрь куни Сергели тумани Қипчоқ кўчасида қурилган кўприкни кўздан кечирди, дея хабар бермоқда Президент матбуот хизмати.
Мазкур кўча Тошкент–Ангрен темир йўли билан кесишган. Бунинг устига тор бўлиб, автомобиллар ҳаракатига қийинчилик туғдирарди.
Шу боис Қипчоқ кўчаси 6 қаторли қилиб кенгайтирилиб, темийўл устидан ўтувчи 772 метрлик кўприк барпо этилди. Унинг эстакада қисми 445, эни 28 метрни ташкил этади.
Давлат раҳбари объектнинг сифати, шаҳарда транспорт тизимини яхшилашдаги аҳамиятига алоҳида эътибор қаратди.
Ушбу кўприк соатига 12 мингтагача автотранспорт воситаларини узлуксиз ўтказиш имкониятига эга. Энг муҳими, у пойтахтдаги иккита йирик кўча – Янги Сергели айланма йўли билан Тошкент ҳалқа йўлини боғлайди. Бу ҳайдовчилар учун анча қулайлик яратади, минглаб транспорт воситалари оқимини ўзига олиб, бошқа кўчалардаги тирбандликни камайтиради.
«Пандемия бошланганда биз ундан кучли, қудратли бўлиб чиқамиз деб мақсад қўйган эдик. Ҳаммамиз кўряпмиз дунёда нималар бўлаётганини. Бошқа мамлакатларда қурилишлар тўхтаб қолган ҳолатлар ҳам бўлди. Халқимиз тартиб-интизом, бирдамлик билан барча режаларини рўёбга чиқармоқда. Биз ҳамжиҳатликда кўп нарсаларга қодирмиз», – деди Шавкат Мирзиёев тошкентлик фаоллар билан суҳбатда.
Президент Шавкат Мирзиёев 2020 йил 4 июнь куни Тошкент шаҳрининг Чўпонота кўчаси ва Кичик ҳалқа йўли кесишмасида қуриладиган кўприк лойиҳаси билан танишган эди. Келгусида янги йўл барпо этилиб, Қипчоқ кўчасидаги мазкур кўприкка туташади.
Шу ерда Туркиянинг Калён компанияси билан ҳамкорликда пойтахтдаги автомобиль йўлларини реконструкция қилиш, транспорт ва йўловчилар ҳаракати учун қулайликларни ошириш лойиҳалари муҳокама қилинди.
Аввалроқ Тошкент метрополитенининг Сергели йўналиши ишга туширилгани, Тошкентда Тахтапул мавзесидаги «танкодром» кўприкнинг тўхтаб қолган таъмири бир ойга қолмай якунланди ҳамда Амударё устида Хоразмни Қорақалпоғистон билан боғловчи 413 метрлик кўприк қурилиши бошлангани ҳақида хабар берилганди.
Изоҳ (0)