«Ҳар бир вилоят ўз аёлларини ҳимояга олсин». Реабилитация марказларида кўчада қолган аёллар билан ишланмаслиги айтилди

Республика ижтимоий реабилитация маркази директори Муқаддам Расулова кўчада қолган ҳамма аёллар билан ишлаш имконияти йўқлигини айтди. «Kun.uz»нинг хабар беришича, бу ҳақда у Ўзбекистон Гендер тенглик комиссиясининг 21 декабрдаги йиғилишида айтиб ўтди.

Унинг билдиришича, зўравонликдан жабр кўрмаса-да, марказда қолишга уринаётган аёллар сони ортмоқда.

«Ҳозирда республика бўйича 180 та марказ фаолият олиб боряпти. Асосий муаммолардан бири шундаки, кўчада қолган аёллар, жабр кўрмаган бўлса-да бизнинг марказга олиб келинмоқда. Уларни қабул қиляпмиз. Чунки борадиган жойи йўқ. Ёнида иккита фарзанди бор. Лекин кейин уларни қайтариб чиқариб юбориш имконияти жуда қийин бўляпти. Бунинг ҳуқуқий асоси ҳам йўқ. Яна бир оғриқли жиҳат, шу пайтгача реабилитация марказларида норматив-ҳуқуқий ҳужжатлар ишлаб чиқилмаган.

Марказларимиздаги аёллар орасида руҳий хаста ва тушкунликка тушиб қолганлари кўп учрайди. Биз аслида фақатгина зўрликдан жабр кўрган аёлларни қабул қилиб, улар билан ишлашимиз керак. Чунки кўчада қолган ҳамма аёллар билан ишлаш имкониятимиз йўқ. Сурхондарё, Қашқадарё, Наманган ва бошқа вилоятлардан бизнинг марказларда аёллар яшамоқда. Уларнинг иккита, учтадан болалари бор», — деган Муқаддам Расулова .

Шунингдек, реабилитация марказига келган аёллар уй-жой талаб қилаётгани, акс ҳолда у ердан чиқиб кетмасликни айтиб тазйиқ ўтказишга ҳам ҳаракат қилишаётганини билдирган.

«Ҳозирда 32 та койкамиз мавжуд ва у ерда 6-7 ойлаб яшаётган аёллар бор. Чунки ҳуқуқий ҳужжат қилинмаган. Буни биргаликда кўриб чиқиб, уларни чиқариб юбориш бўйича ички ишлар органларидан ёрдам сўраяпмиз. Ҳамма вилоятлар ўзларининг аёлларини ҳимояга олсин. Вакиллари келиб олиб кетишсин», — деган марказ раҳбари.

«Куни кеча Сурхондарёдан бир аёлни олиб келишди. Унинг 3 нафар фарзанди эрида қолган. Биз 3 кун муддатга деб қабул қилиб олдик. Лекин ҳозир ‘мен кетмайман, ишлайман, шу ерда қоламан’, деяпти. Улар тушкунликка тушиб қолган аёллар ҳисобланади», — деган Муқаддам Расулова.

Маълум қилинишича, 2020 йилнинг ўтган 11 ойи давомида ички ишлар органлари томонидан турли тазйиқ ва зўравонликларга учраган 11 минг 138 нафар хотин-қизга ҳимоя ордери берилган. Уларнинг 9 минг 916 нафари (89 фоиз) оилада тазйиқ ва зўравонликка учраган, 5 минг 418 нафарига нисбатан эса жисмоний зўравонлик содир этилган. Шунинг натижасида 652 та оила ажрашиб кетган.