Бухоро вилоятининг Қоракўл туманидаги халқаро математика мактаби қурилишида ўғриликка қўл урган шахслар қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Қоракўл халқаро математика мактаби биносида қурилиш-таъмирлаш ишларини олиб бориш учун «Sharq plyus» МЧЖ томонидан жами баҳоси 48 миллион 160 минг сўмлик 56 дона (860 та қовурға) иситиш батареялари олиб келинган. Бироқ МЧЖ раҳбари уларни айни ўрнатиш жараёнида талон-торожликка йўл қўйилгани учун туман ИИБ ҳузуридаги тергов бўлинмасига мурожаат қилган.Аниқланишича, қурилиш ишларини олиб бораётган шахсларга нисбатан Жиноят кодексининг 169-моддаси 2-қисми (ўғрилик) билан жиноят иши қўзғатилиб, дастлабки тергов ҳаракатлари олиб борилган.
Олиб борилган тезкор суриштирув ҳаракатлари давомида ушбу жиноятни Қоракўл туманида яшовчи 33 ёшли Қ.М. ҳамда Олот туманида яшовчи А.Қ., ва қоракўллик 47 ёшли Г.Б.лар содир этгани маълум бўлган.
Қоракўл халқаро математика мактабида ўғрилик содир қилган шахсларнинг қилмиши фош этилиб, ашёвий далиллар билан қўлга олинган. Ҳозирда Қоракўл туман ИИБ ҳузуридаги тергов бўлинмаси томонидан ушбу шахсларга нисбатан дастлабки тергов ҳаракатлари давом эттирилмоқда.
Эслатиб ўтамиз, Қоракўлдаги халқаро математика мактабининг ўқув биноси йўқлиги сабаб Президент топшириғига кўра, мактабга бино қуриб бериш учун 50 миллиард сўм ажратилгани ва 2020 йилнинг ноябрь ойида 85 фоиз қурилиш ишлари якунлангани хабар берилган эди.
Изоҳ (0)