“Ўзбекистон—Туркманистон—Озарбайжон” форматида уч томонлама учрашув бўлиб ўтди

Бугун, 5 август куни Туркманистонда БМТнинг денгизга чиқиш имкони бўлмаган ривожланаётган мамлакатлар бўйича 3-конференцияси ўтказилмоқда. Анжуман доирасида Ўзбекистон президенти Шавкат Мирзиёев, Туркман халқ маслаҳати раиси Гурбангули Бердимуҳамедов ва Озарбайжон бош вазири Али Асадовнинг уч томонлама учрашуви бўлиб ўтди.

Президент матбуот хизмати хабарига кўра, учрашувда минтақавий ҳамкорликни кенгайтириш ва қўшма лойиҳаларни илгари суриш масалалари кўриб чиқилган.

Энг аввало, энергетика, транспорт ва логистика, саноат ва қишлоқ хўжалиги соҳаларида кооперация учун имкониятлар мавжудлиги қайд этилди. Амалий ҳамкорликнинг истиқболли лойиҳаларини ишлаб чиқиш учун мазкур форматдаги мулоқотларни давом эттиришга келишиб олинди, дейилади манбада.

Аввалроқ БМТ конференциясида хорижий давлатлар ва ҳукуматлари раҳбарлари, халқаро ва минтақавий ташкилотлар раҳбарлари иштирок этиб, қатор масалаларни муҳокама қилганди.

Анжуманда сўзлаган нутқида президент Шавкат Мирзиёев Марказий Осиёда транспорт-логистика тармоқларини ривожлантириш масаласига тўхталди. Жумладан, Ўзбекистон денгиз коммуникацияларига фақат бир неча давлатлар ҳудуди орқали чиқиши мумкинлигига урғу берди.

“Биз учун деярли уч минг километр масофада жойлашган портлардан географик олислик бир қатор объектив муаммоларни вужудга келтирмоқда. Булар — юқори тарифлар, транспорт йўлаклари ва инфратузилмаларнинг ўтказиш имконияти чеклангани, шунингдек, бошқа давлатларнинг божхона-транзит сиёсатига боғлиқликда намоён бўлмоқда”, деган давлат раҳбари.

Жаҳон банки маълумотларига кўра, транспорт харажатларининг катталиги ва транзит тизимининг беқарорлиги туфайли Марказий Осиё минтақаси ҳар йили ялпи ички маҳсулотнинг икки фоизигача йўқотмоқда. Логистика харажатлари маҳсулотлар умумий нархида 60 фоизгача етмоқда. Бу рақам жаҳондаги ўртача кўрсаткичлардан бир неча баробар юқоридир.

“Шу боис, ишончли янги транзит йўлаклари ва логистика инфратузилмасини ривожлантириш Марказий Осиёда барқарор тараққиётнинг муҳим омилига айланмоқда”, дея таъкидлаган президент.

Нутқда Ўзбекистон—Афғонистон—Покистон темирйўлини қуришни тезлаштириш, уни қурилаётган Хитой—Қирғизистон—Ўзбекистон темирйўл магистрали билан боғлаш муҳимлиги ҳақида ҳам сўз борган. Бу минтақада янги савдо-иқтисодий макон ва барқарор транспорт инфратузилмасини шакллантириш учун катта имконият яратиши таъкидланган. Шунингдек, Ўрта йўлакни ривожлантиришга устувор аҳамият қаратилиши айтилган.