«Меҳр ва оқибат» ҳайвонларни ҳимоя қилиш жамияти Навоийда ҳайвонларга шавқатсизларча муносабатда бўлганлик ишини илк бор судгача оширишга эришди, деб хабар бермоқда «Gazeta.uz».
Маълум қилинишича, 21 ноябрь куни «Меҳр ва оқибат» жамиятига икки аёл — она-бола 17 ноябрь куни уларнинг ҳовлисига маҳалла қўмитаси вакиллари, дайди ҳайвонларни тутиш хизмати ва ветеринария ходимлари бостириб киргани тўғрисида мурожаат қилган.
Унда айтилишича, участка профилактика инспектори ҳам келиб, икки уй бекасининг катта ёшдагисини маҳкам ушлаб, унинг немис овчаркаларини қандай отиб ўлдиришаётганини кўрмаслиги учун кўзларини мажбурлаб бекитган.
Икки авчарка боласи ҳалок бўлган, улардан бири уйга қочиб яширинишга улгурган, аммо кейинчалик, аёлнинг сўзларига кўра, у ҳам ҳалок бўлган. Катта итларнинг бири ҳам яраланган.
Итларнинг эгасининг айтишича, куни кеча у пахта терими ишига чиқишга рози бўлган, чунки шундай қилса маҳаллий ҳокимлик вакиллари унинг итларига тегмасликка ваъда берган.
Ҳайвонларни ҳимоя қилиш жамияти волонтёрлари — ҳуқуқшунос Амир ва Навоийдан бўлган Гулнора маҳаллий профилактика инспектори ва жабрланган ҳайвонларнинг эгалари билан доимий алоқада бўлиб, аёлларга ИИВ, Бош прокуратура ҳамда Навоий ва Навоий вилояти прокуратураларига ариза ёзишда ёрдам берган. Суд мажлисида ҳайвонларни ҳимоя қилиш жамияти ишончномасига кўра волонтёрлардан бири ҳам иштирок этган.
Суд дайди ҳайвонларни тутиш хизмати ходимини базавий ҳисоблаш миқдорининг бир баравари (223 минг сўм) миқдорида жарима тортиш тўғрисида қарор чиқарган. «Ҳайвонлар отилишига йўл қўйган бошқа ҳеч бир шахс жазоланмаган», — деб таъкидланган ҳайвонларни ҳимоя қилиш жамиятида.
«Меҳр ва оқибат» участка профилактика инспектори ҳам жавобгарликка тортилиши керак, деб ҳисобламоқда ва бу масалада адолатга эришиш учун ҳаракат қилишда давом этмоқчи.
Аввалроқ Навоий вилояти прокуратураси «Меҳр ва оқибат» ҳайвонларни ҳимоя қилиш жамиятининг мурожаатига асосан хусусий ҳайвонот боғи директори Соҳиба Барноевага нисбатан ҳайвонларни сақлашдаги қонунбузарлигига оид ишни кўриб чиқиб, 21 декабрь куни хусусий боғ директорига нисбатан огоҳлантириш эълон қилган ва барча камчиликларни бартараф этишга беш кун муҳлат берганди. Берилган муддат ичида қонунбузарлик ҳолатлари бартараф этилмаса, иш қайта кўриб чиқилади. Ушбу ҳайвонот боғида сақланган ҳайвонлар реабилитация учун Тошкентга олиб келинган.
Изоҳ (0)