Таниқли журналист Абдукарим Мирзаев Туркияда қамоққа олинди

Таниқли журналист, Туркиянинг Кастамону университети Коммуникациялар факультети журналистика бўлими магистранти Абдукарим Мирзаев 11 декабрь куни турк полицияси томонидан қўлга олинди, деб хабар беради «Gazeta.uz».

Журналистни ҳуқуқий жиҳатдан ҳимоя қилиш учун ёлланган адвокат вазиятни ўргангач, кимдир Абдукарим Мирзаевга тегишли рақам орқали шубҳали шахслар билан мулоқотда бўлгани ҳақида хабар бергани, ушбу маълумот ортидан журналист кузатилиб, сўнгра қўлга олинганини аниқлаган.

Абдукарим Мирзаевнинг турмуш ўртоғи бу ҳолатга изоҳ берар экан, охирги вақтлар, айниқса, сўнгги икки-уч ойда кўрсатувлари интернетда катта қизиқиш билан кузатилаётган журналистга нафақат Ўзбекистон, балки дунёнинг кўпгина давлатларидан мухлислари қўнғироқ қилиб, ҳурматини билдиргани, айримлари оилавий муаммоларини айтиб, ундан маслаҳат сўраганини таъкидлаган. Бундай вазиятда қўнғироқ қилувчи шахснинг кимлиги, мақсадларини аниқлаш, умуман, вазиятни назорат қилиш мутлақо имконсиз эканини айтган.

Шунингдек, журналист ҳибсга олинишидан 10 кунча олдин, аниқроғи 28 ноябрь куни кундузги 12:20-13:30 лар оралиғида оилавий ҳордиқ чиқариш ва видеолавҳа тасвирга олиш мақсадида Истанбулнинг Мармара денгизи ёқасидаги Флориа соҳилига чиққанида замонавий кийинган (шимда) тўрт аёл (икки нафари 35-40, икки нафари 16-17 ёшларда) улардан телефон қилиб олишни сўрагани, шундан кейин Абдукарим Мирзаевнинг телефонига турли рақамлардан эркаклар қўнғироқ қилгани, SMS хабарлари ёзганини таъкидлади. Ушбу воқеадан кейин янги олинган мобил телефони секин ишлашни, қотиб қолишни ҳам бошлаган.

10 декабрдан 11 декабрга ўтар кечаси ярим оқшомда зирҳли автомобилларда келган қуролланган ва ҳарбий либосдаги тўрт киши, шунингдек, фуқаро кийимидаги шахслар Абдукарим Мирзаевнинг уйига келиб, тинтув ўтказган. Улар уйдан ҳеч қандай шубҳали нарса топа олмаган ва қўшнилар гувоҳлигида ҳужжатларни расмийлаштириб, журналистни олиб кетишган.

Маълумот учун, Абдукарим Мирзаев — ўзбекистонлик журналист, кинорежиссёр ва блогер. 2010 йилдаги Қирғизистонда бўлиб ўтган воқеаларни ёритиб берган «Дардга даво истаб» номли фильми билан машҳур бўлган. Фильмда ҳар икки халқ зиёлилари вакиллари томонидан мавжуд вазиятдан чиқиш, қонли воқеалар натижасида йўқолган азалий яхши қўшничилик анъаналарини тиклаш йўллари муҳокама қилинади.

Аввалроқ «Ziyo.uz» портали асосчиси Давронбек Тожиалиев Истанбулга киритилмай, Ўзбекистонга депортация қилингани тўғрисида хабар берилганди.