Сирдарё вилояти ҳокимининг ўринбосари Хоразм вилояти ҳокимига ўринбосар бўлди

Комилжон Эркинович Собиров Хоразм вилояти ҳокимининг қишлоқ ва сув хўжалиги масалалари бўйича ўринбосари лавозимига тайинланди. Бу ҳақда Хоразм вилояти ҳокимлиги ахборот хизмати хабар берди.

Комилжон Собиров шу вақтгача Сирдарё вилояти ҳокимининг қишлоқ ва сув хўжалиги масалалари бўйича ўринбосари лавозимида ишлаб келаётган эди.

Янги ўринбосар мазкур лавозимда 2020 йил мартидан буён вилоят ҳокимининг қишлоқ ва сув хўжалиги масалалари бўйича ўринбосари бўлган Отабек Юсуповнинг ўрнини эгаллади.

Аввалроқ Ботир Саидов Хоразм вилояти ҳокимининг туризм ва спортни ривожлантириш масалалари бўйича ўринбосари лавозимига тайинлангани ҳақида хабар берилганди. Шунингдек, вилоятнинг Хонқа туманига, Хива ва Урганч шаҳарларига ҳам янги раҳбарлар тайинланганди.