Бош вазир ўринбосари, Туризмни ривожлантириш давлат қўмитаси раҳбари Азиз Абдуҳакимов «Дарё» мухбири Миролим Исажоновга берган қисқача интервьюсида Тангемнинг Ўзбекистонга қачон келиши кутилаётганига оид саволга жавоб қайтарди.
Эслатиб ўтамиз, Ўзбекистоннинг Кореядаги туристик бренд элчиси, машҳур «Сарой жавоҳири» телесериалидаги Тангем роли ижрочиси Ли Ён Э 2020 йилнинг июнь ойида ўзбек халқига видеомурожаат йўллаган эди. У ўз мурожаати давомида тезроқ Ўзбекистонга келиб, мухлислари билан учрашишни интиқиб кутаётганини билдирган эди.
Азиз Абдуҳакимовнинг маълум қилишича, актрисанинг Тошкентга ташрифи пандемиядан олдин режалаштирилган эди.
«Аммо Кореяда ҳам, бизда ҳам қатъий карантин қоидалари амалга оширилгач, унинг келиши қолдирилди. Бироқ Ли Ён Э биз билан ҳозиргача ҳамкорликда ишлаяпти, элчилик фаолиятини фаол равишда давом эттирмоқда» – деди бош вазир ўринбосари.
Тангемнинг карантин вақтида ўзбекистонлик мухлисларига юборган бир қанча видеомурожаатларини ОАВ ва ижтимоий тармоқлар орқали юртдошларимизга ҳавола этилган.
«Актрисанинг ҳам карьераси ва шахсий ҳаёти бор, мамлакатимизга қачон келиши унинг графигига боғлиқ. Лекин у доимо республикамизга келишни истайди, бу фикрларни онлайн мулоқотларимизда ҳам таъкидлайди. Биз Ўзбекистоннинг чет эл давлатларидаги туризм элчиларига йилда камида бир марта Тошкентга реклама мақсадида келишига шароит яратиб берамиз. Улар ташрифларидан сўнг ижтимоий тармоқлардаги саҳифаларига саёҳати давомидаги суратлар ва роликларни жойлашади, оммавий ахборот воситалари орқали турли промо-акциялар уюштиришади», – деди Азиз Абдуҳакимов.
Маълумот учун, 2020 йилнинг апрель ойида Ли Ён Э Ўзбекистон халқига ўзи бош ролни ижро этган «Саимдан ранг-баранг хотиралар» номли телесериалини ҳадя қилган. Актриса ушбу сериал айни дамда аксарият вақтини уйда ўтказаётган Ўзбекистон аҳолисига вақтни мазмунли ўтказишига ёрдам беради, дея умид билдирган эди.
Изоҳ (0)