«Тошкент шаҳар сув таъминоти» МЧЖда 18 декабрь куни бўлиб ўтган матбуот анжуманида пойтахт аҳолисининг ичимлик суви таъминоти ва канализация хизматлари учун нархларни ошириш бўйича халқ депутатлари Тошкент шаҳар кенгаши қарори лойиҳаси бўйича изоҳ берилди. Бу ҳақда «Kun.uz» хабар берди.
Қайд этилишича, сув ишлаб чиқариш таннархи амалдаги нарх билан мутаносиб эмас.
«Бугунги кунда корхона томонидан 1 куб метр сув ишлаб чиқариш учун 372 сўм сарфланмоқда. Кўриниб турибдики, таннархнинг ўзи аҳоли учун ҳисобланган 1 куб метр ичимлик суви нархидан (310 сўм) 62 сўмга қиммат.
Шу каби омиллар сабаб ‘Тошкент шаҳар сув таъминоти’ МЧЖ 2019 йилда 58,8 миллиард сўм ҳамда 2020 йилнинг 8 ойида 21,3 миллиард сўм зарар кўрди», — деди «Тошкент шаҳар сув таъминоти» МЧЖ директори Мақсуд Аббосхонов.
Таъкидланишича, тизим ва тармоқларнинг эскирганлиги туфайли сув таъминотида узилишларнинг олдини олиш, ичимлик суви ва канализация хизматларининг сифатини ошириш бўйича 2021 йилга режалаштирилган тадбирларни инобатга олган ҳолда янги тарифлар бўйича таклифлар тайёрланган.
«Тошкент шаҳар сув таъминоти» МЧЖ директорининг иқтисодий масалалар бўйича ўринбосари Илҳом Толипов таклиф этилаётган янги нархлар эвазига 2021 йилда қуйидаги ишлар амалга оширилишини маълум қилди.
Насос станциялардаги сув узатиш тизимини автоматлаштириш (SCADА) ҳисобига ва эскирган насосларни янги замонавий энерготежамкор насосларга алмаштириш. Бунинг натижасида сув ишлаб чиқариш ҳажми 17,6 миллион куб метрга камайтирилади ва йилига 6 миллион киловатт электр энергияси тежалади;
Ҳар йили эскирган ичимлик суви ва канализация қувурлари 69 километрдан таъмирланади. Маълум қилинишича, ҳозирда Тошкент шаҳридаги сув қувурларини таъмирлаш жуда орқада қолган. Шу сабабли йилига 69 километрдан таъмирлаш эвазига тахминан 8 йил муддатда бу борадаги нормага тушиб олинади. Ҳозирда имкониятдан келиб чиқиб йилига 15-20 километр узунликдаги қувурлар таъмирланмоқда.
Жамият асосий ишчи ходимларининг ўртача ойлиги 1-1,2 миллион сўмни ташкил қилмоқда. Янги тарифлар тасдиқланса, ходимларнинг ўртача ойликлари 1,8 миллион сўмга етказилади. Маълум қилинишича, жамият раҳбарларининг ўртача ойлиги 3-3,5 миллион сўм ва уларнинг ойлигини ошириш кўзда тутилмаган.
Шунингдек, янги тарифлар жамиятнинг халқаро молия институтлари олдидаги қарзларини ўз вақтида қайтариш имконини беради. Ҳозирда Ислом тараққиёт банкидан 24 миллион доллар миқдорида қарздорлик қолган, жадвалга асосан, йилига 3 миллион доллар қайтарилмоқда. Шунингдек, «Тошкент шаҳар сув таъминоти» МЧЖ Европа тикланиш ва тараққиёт банкидан 30 миллион доллар миқдоридаги кредитни олмагани маълум қилинди. Бу борадаги музокаралар пандемия бошланганида тўхтатиб қўйилган.
«Бошқа коммунал хизматлар нархи барча ҳудудлар учун бир хил миқдорда, ичимлик суви эса ўша ҳудуднинг сув етказиб беришдаги географик жойлашуви, унга кетадиган сарф-харажатлардан келиб чиқиб белгиланади. Тошкент шаҳри сув нархи энг арзон бўлган ҳудудлардан ҳисобланади. Пойтахтдаги истеъмолчилар учун марказлашган ичимлик сувининг 1 литри нархи амалдаги 31 тийин ўрнига 50 тийинга ошиши кутилмоқда», — дея маълум қилган «Тошкент шаҳар сув таъминоти» МЧЖ директори.
Эслатиб ўтамиз, Тошкент шаҳар ҳокимлиги «Тошкент шаҳрида ичимлик сув таъминоти ва оқова сув хизматлари учун тартибга солинадиган нархларни белгилаш чора-тадбирлари тўғрисида»ги қарор лойиҳаси билан «Тошкент шаҳар сув таъминоти» МЧЖнинг ҳозирги кунда амалда бўлган тарифини оширишни таклиф этмоқда.
Изоҳ (0)