Тошкент шаҳрининг бош режасини 2023 йилда қабул қилиш режалаштирилмоқда. Бу ҳақда «Тошкент ёшлар форуми—2020»да қурилиш вазирининг биринчи ўринбосари Шерзод Ҳидоятов маълум қилди, деб ёзмоқда «Gazeta.uz».
Унинг сўзларига кўра, пойтахтнинг бош режасини ишлаб чиқиш учун ҳозирги пайтда бутун дунёдан лойиҳа ташкилотлари билан музокаралар олиб борилмоқда.
«Биз Эстония, Туркия, Европа ва Америкадан энг яхши ва замонавий лойиҳа институтларини кўриб чиқамиз, хусусан, шаҳарсозлик соҳасидаги ва аҳоли учун қулайлик яратиш нуқтаи назаридан. Улар билан бирга танловга тайёрланамиз. Лойиҳани тузиш учун биз талабларни ишлаб чиқдик, улар асосида танловга тайёргарлик кетмоқда. Бу танловда энг асосийси — 2022 йилнинг охиригача бош режани тузишни якунлаш ва уни аҳолига тақдим этиш. Аҳолига тақдим этилганидан кейин у қабул қилиш учун таклиф этилади. 2023 йилда Тошкентнинг бош режасини қабул қилиш режалаштирилмоқда», — дея маълум қилган Шерзод Ҳидоятов.
Вазир ўринбосарининг билдиришича, танлов очиқ ўтказилади. Унда, тахминан, 30 та компания иштироки кутилмоқда.
«Танлов осон бўлмайди, чунки ҳамма ҳам бош режани ишлаб чиқа олмайди. Биз (бош режани), бошқа мамлакатларда бош режалар ишлаб чиққан компанияларни, улар аҳоли учун қандай қулайликлар яратганини аниқ ўрганишимиз керак, кейин эса ҳамкорликдаги ишни бошлашимиз лозим», — дея қайд этди Шерзод Ҳидоятов.
Аввалроқ Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича ўринбосари Даврон Ҳидоятов Тошкентнинг бош режаси концепцияси 2019 йилнинг апрель ойи охиригача 3D форматида тайёрланишини маълум қилган. Уни яратиш устида Хитой, Туркия ва Буюк Британия компаниялари иш олиб бораётгани қайд этилганди. Бироқ муддатлар ўзгарди — Туркия компания томонидан иш олиб борилаётган пойтахтнинг лойиҳа ҳужжатини 2020 йилда тақдим этиш режалаштирилганди.
Қурилиш вазирининг биринчи ўринбосарининг қайд этишича, хорижий компаниялар аввалроқ ўз таклифларини берган. Маълум бўлишича, бош режани яратиш учун жуда кўп маълумотлар талаб қилинади, жумладан, барча йўллардаги қатнов, автомобиллар ҳаракати, уларнинг тўпланиши, қаерда кўприклар кераклигини аниқлаш. Бунинг учун Тошкент шаҳрининг транспорт концепцияси тўлдирилмоқда. Мазкур концепция Тошкент шаҳар ҳокимияти томонидан Туркиянинг Kalyon компанияси билан ҳамкорликда ишлаб чиқилган.
«Аҳоли ва иқтисодиётнинг ўсишини ҳисобга олган ҳолда бу маълумотлар бош режани ишлаб чиқишда биз учун жуда муҳим. Мазкур компаниянинг бизнинг олдимизга бу саволларни қўйганда биз муддатларни сурдик, чунки биз барча тизимларни ўрганишимиз керак. Ўрганишлардан кейин бу маълумотлар юкланади, бу эса ҳақиқий ва сифатли бош режани тузишга имкон беради», — деди вазирлик масъули.
Ўзбекистон Президентининг фармони билан 2025 йилгача Ўзбекистоннинг барча шаҳарлари ва шаҳар посёлкаларининг чорак қисмининг бош режалари тасдиқланиши керак. Бунда лойиҳа ҳужжатлари жамоатчилик муҳокамаларининг натижаларини ҳисобга олган ҳолда тасдиқланиши керак.
Изоҳ (0)