Tashkent City’даги Congress Hall мажмуасида «Тошкент ёшлар форуми — 2020» доирасида 18 декабрь куни «Тошкентнинг маданий ва туристик қиёфаси – 2030» мавзусида очиқ мулоқот бўлиб ўтди. Унда бир қанча вазирлик раҳбарлари форум иштирокчиларининг саволларига жавоб қайтарди.
Эслатиб ўтамиз, 2018 йилнинг июнь ойида Олмазор туманида бўлиб ўтган мажлисда Президент Шавкат Мирзиёев томонидан Тошкент халқаро Вестминстер университети талабаси Саидакбархон Акбаров Туризмни ривожлантириш қўмитаси раиси ўринбосарлигига номзод сифатида таклиф этилганди. Шундан сўнг Вазирлар Маҳкамаси қарори билан Саидакбархон Акбаров Туризмни ривожлантириш қўмитаси раиси ўринбосари вазифасини бажарувчи этиб тайинланган.
«Дарё» мухбири Миролим Исажоновнинг хабар беришича, Туризмни ривожлантириш давлат қўмитаси раиси Азиз Абдуҳакимов ҳам ёшлар томонидан йўлланган саволларга ўз муносабатини билдирди. Хусусан, 23 ёшида ҳукумат қарори билан Туризмни ривожлантириш қўмитаси раиси ўринбосари вазифасини бажарувчи этиб тайинланган Саидакбархон Акбаровнинг орадан ҳеч қанча вақт ўтмай нима сабабдан лавозимидан кетганига изоҳ берди.
«У йигитимиз ишга жуда яхши киришди. Бу жуда катта лавозим ва катта масъулият талаб қилади. Бундай лавозимда ишлаган одам бутун вақтини ишга бағишлаши керак. Саидакбархон ҳали дипломга эга эмаслиги учун ўзи бу лавозимдан кетишини айтди. Диплом олиши кераклигини ва ўзини бизнесда синамоқчи эканини таъкидлаб, қўйиб юборишимизни сўради.
Ташкилот раҳбарининг ўринбосари бўлиб ишлаш учун жуда катта тажриба керак. Саидакбар учун бу тажриба бўлди. Биз унга қўлдан келганча ёрдам бердик. Аммо унинг ўзи бу лавозимдан хоҳиши билан кетишни сўради», – деди Абдуҳакимов.
Маълумот учун, Саидакбархон Акбаров биринчи Марказий Осиё ёшлар туристик форумини ўтказиш ташаббуси билан чиққан эди.
Изоҳ (0)