Англиянинг Чешир графлигида йирик ёнғин содир бўлди. Ёнғин юз берган биноларнинг бирида 70 та ноёб суперкар бўлгани айтилмоқда, деб хабар беради Motor. Ёнғин бир нечта ноёб автомобилларни, хусусан, қиймати 4 миллион доллар турадиган моделни ҳам яксон қилган.
Маҳаллий ўт ўчириш бригадасига ёнғин ҳақидаги хабар соат 22:00 ларда келиб тушган. Воқеа жойига етиб келган қутқарувчилар ёнғин ичида қолган бир нечта бинога дуч келган. Кўчмас мулк эгасининг сўзларига кўра, бино ичида ўнлаб спорт автомобиллари мавжуд. Олтита экипаж бир неча соат давомида оловга қарши курашган, бироқ улар бирорта ҳам машинани қутқариб қолишга муваффақ бўлмаган. Ёнғин оқибатида суперкарларнинг барчаси кулга айланган.
Маълум бўлишича, бино ҳудудидаги гаражда 70 га яқин экслюзив автомобиллар, жумладан, Ferrari, Lamborghini, Porsche ва Jaguar’нинг моделлари бўлган. Мулк эгасининг асосий йўқотишига қиймати 4 миллион доллар турган суперкар айланган. Мазкур модель номи ошкор қилинмаган.
Ёниб кетган автомобиллар ва етказилган зарарнинг умумий қиймати тергов давомида аниқланади. Бироқ ҳозирдан тахмин қилиш мумкинки, ноёб автомобиллар эгаси ўнлаб миллион долларидан айрилган. Бу қадар кенг кўламли ёнғин нима сабабдан келиб чиққани ҳозирча номаълум.
Аввалроқ АҚШда автосалон ва юзлаб машиналар ёқиб юборилгани тўғрисида хабар берилганди.
Мавзуга доир: Видео: АҚШдаги автопаркда 3,5 минг автомобиль ёниб кетди
Изоҳ (0)