Самарқандда 14 ёшли ҳайдовчи бошқарувидаги Tracker автомобили иштирокида йўл-транспорт ҳодисаси содир бўлди, дея хабар бермоқда ЙҲХББ.
Маълум қилинишича, 2020 йил 15 декабрь соат 23:30 ларда Самарқанд вилоятининг Оқдарё туманидан ўтувчи халқаро аҳамиятга эга бўлган М-37 автомобиль йўлининг 10-километрида ўлим билан якунланган йўл-транспорт ҳодисаси содир бўлди.
Оқдарё туманининг «Даҳбед» маҳалласидан ўтувчи қисмидан Бухоро–Самарқанд йўналиши бўйича 2006 йилда туғилган бола бошқарувидаги Tracker русумли транспорт воситаси йўлнинг ўртасига ўрнатилган 5.11.1 (қайрилиб олиш жойи) йўл белгисининг бетон тўсиғига урилган. Оқибатда ҳайдовчининг ёнида бўлган 14 ёшли бола воқеа жойида вафот этган.
«Соат тахминан 7–8 ларда машинани олиб чиқдим. Ойим намоз ўқиётган вақт. Уйдагиларнинг хабари йўқ эди. Дўстимга телефон қилдим. Дўстимни ва унинг танишини йўлдан олдим.
Йўлда кетаётганимизда қаршимиздан Spark чиқиб қолди. Сигнал чалсам ҳам тўхтамади. Уни уриб юбормаслик учун уни айланиб ўтаман деганимда машинани устунга уриб олдим.
Ундан кейин нима бўлгани эсимда йўқ. Дўстимнинг танишини шифохонага олиб бордик. ЭКГ қилишганда уни вафот этгани аниқланди. Қилган ишимдан пушаймонман», – дейди ҳайдовчи.
Ҳайдовчининг отаси ўғлини огоҳлантирганини таъкидлади.
«Қонунда нима чора бўлса, мен розиман отаси сифатида, жавобини берсин. Уни оқламоқчи эмасман», – дейди отаси.
ЙТҲ келиб чиқиш сабаби ўрганилганда, воқеа автомашина тезлиги меъёридан оширилгани ва ҳайдовчининг тажрибасизлиги оқибатида содир бўлгани аниқланган.
Аввалроқ Пахтачида йўлни белгиланмаган жойдан кесиб ўтаётган пиёдани Spark уриб кетиши оқибатида жабрланувчи вафот этгани, Наманганда MAN ва Nexia иштирокида юз берган ЙТҲ оқибатида 6 киши ҳалок бўлгани ҳамда Тошкентда Mercedes Gelendvagen ва Nexia иштирокида юз берган ЙТҲда ҳайдовчилардан бири жароҳат олгани ҳақида хабар берилганди.
Изоҳ (0)