Россияда октябрь ойида 47 777 киши ёки 2019 йилнинг шу ойига нисбатан 30,3 фоизга ортиқ киши вафот этди. Бу ҳақда «Росстат» хабар берди, деб ёзмоқда Meduza.
Ортиқча ўлимлар сони бўйича Москва (3254 киши), Самара вилояти (2269 киши), Ростов вилояти (2240 киши), Челябинск вилояти (2145 киши) ва Олтой ўлкаси (1780 киши) етакчи бўлди.
Шу билан бирга, «Росстат» маълумотларига кўра, октябрь ойида коронавирус ва унинг асоратларидан жами 15 607 киши вафот этди.
«Росстат» маълумотларига кўра, октябрь ойидан март ойигача бўлган бутун пандемия даврида ортиқча ўлимлар сони 138 325 кишини ташкил қилди.
Ортиқча ўлимлар 90—100 фоиз ҳолатларда қандайдир тарзда коронавирусга чалиниш билан боғлиқ. Бунга ортиқча ўлим ҳолатлари батафсил таҳлил қилинган айрим ҳудудлар ҳисоботлари гувоҳлик бермоқда (масалан, апрель ойидан буён Москва соғлиқни сақлаш департаменти бу билан шуғулланмоқда). Ўлим ҳақидаги маълумотларнинг ўзи «Росстат»га марҳумнинг қариндошларига ўлим ҳақидаги гувоҳнома берувчи ФҲДЁ идораларидан келиб тушади. Бу энг аниқ маълумот ҳисобланади, аммо ҳар ой якунидан 35—40 кун ўтиб чоп этилади. Бу эса эпидемия шароитида жуда катта кечикиш.
Аввалроқ Россияда пандемия бошланганидан буён ортиқча ўлим ҳолати 120 минг кишини ташкил этгани, бу тезкор штабнинг COVID-19 борасидаги маълумотларидан тўрт баробарга кўп эканлиги ҳақида хабар берилганди. Кейинроқ бош вазир ўринбосари Татяна Голикова ҳолатга изоҳ бериб, «Росстат»нинг коронавирус билан боғлиқ ўлим статистикалари ишончли эканлигини айтган.
Изоҳ (0)