Арманистонда мамлакат бош вазирининг истеъфосини талаб қилаётган норозилик намойишлари қайта бошланди. Бунга Тоғли Қорабоғдаги ҳарбий ҳаракатлардан кейин бир қатор ҳудудларни Озарбайжонга бериш ҳақидаги қарор сабаб бўлган. Бу ҳақда «Интерфакс» хабар берди.
Маълум бўлишича, норозилик намойишларининг 34 нафар иштирокчиси қўлга олинган ва полиция бўлинмаларига олиб борилган.
Ереванда намойишчилар кўчаларни тўсиб қўйган, Арманистон пойтахти марказида транспорт ҳаракати тўхтаб қолган. Полиция автомобиллар ҳаракатини қайта тиклашга уриниб, намойиш қатнашчиларини қўлга олмоқда. Ереван метрополитени бекатларидан бири намойишчилар томонидан ёпиб қўйилган ва бу поездлар ҳаракатланишига имкон бермаяпти.
Мамлакатнинг Арарат ва Ширак вилоятларида намойишчилар вилоят маъмуриятлари биноларига ходимларнинг киришига тўсқинлик қилиб, уларнинг ишини тўхтатиб қўйган.
Мухолифат партияси ноябрь ойида Арманистон бош вазири Россия ва Озарбайжон раҳбарлари билан Тоғли Қорабоғдаги ҳарбий ҳаракатларни тўхтатиш ва минтақадаги ҳудудларнинг бир қисмини Озарбайжонга топшириш ҳақидаги келишувни имзолаганидан буён унинг истеъфосини талаб қилмоқда. Пашиняннинг рақобатчилари фуқаролар унга бўйсунмаслик акциясини бошлаганини маълум қилди.
«Биз Пашинянга истеъфога чиқиши учун 8 декабрь соат 12:00 гача вақт бердик, бироқ истеъфо берилмади. Шу вақтдан бошлаб соат 17:00 гача Арманистон фуқаролари бўйсунмаслик акциясига чиқиш ҳуқуқига эга. Барчани қонун доирасида ҳаракат қилишга чақирамиз», — дея маълум қилган «Дашнакцутюн» мухолифат партияси вакили Ишхан Сагателян.
У полиция ходимларини «Пашиняннинг ноқонуний буйруқларига» бўйсунмасликка чақирган.
5 декабрь куни бўлиб ўтган намойишда мухолифат Пашиняндан 8 декабрь куни соат 12:00 гача истеъфога чиқишни талаб қилган. Акс ҳолда мухолифат бутун Арманистон бўйлаб бўйсунмаслик акциясини бошлашни ваъда қилган.
Эслатиб ўтамиз, 16 ноябрь куни Арманистон ташқи ишлар вазири Зограб Мнацаканян истеъфога чиққанди. Бунгача Пашинян вазирни унинг назорати остида икки йил давом этган музокаралар жараёни «ҳудудларни топширишни қайтариб бўлмас даражага олиб келганида» айблаган.
20 ноябрда Арманистон ҳукуматининг уч аъзоси — мудофаа вазири Давид Тоноян, меҳнат вазири Заруи Батоян ва фавқулодда вазиятлар вазири Феликс Солaкян истеъфога чиққанди.
Изоҳ (0)