Armanistonda mamlakat bosh vazirining iste’fosini talab qilayotgan norozilik namoyishlari qayta boshlandi. Bunga Tog‘li Qorabog‘dagi harbiy harakatlardan keyin bir qator hududlarni Ozarbayjonga berish haqidagi qaror sabab bo‘lgan. Bu haqda “Interfaks” xabar berdi.
Ma’lum bo‘lishicha, norozilik namoyishlarining 34 nafar ishtirokchisi qo‘lga olingan va politsiya bo‘linmalariga olib borilgan.
Yerevanda namoyishchilar ko‘chalarni to‘sib qo‘ygan, Armaniston poytaxti markazida transport harakati to‘xtab qolgan. Politsiya avtomobillar harakatini qayta tiklashga urinib, namoyish qatnashchilarini qo‘lga olmoqda. Yerevan metropoliteni bekatlaridan biri namoyishchilar tomonidan yopib qo‘yilgan va bu poyezdlar harakatlanishiga imkon bermayapti.
Mamlakatning Ararat va Shirak viloyatlarida namoyishchilar viloyat ma’muriyatlari binolariga xodimlarning kirishiga to‘sqinlik qilib, ularning ishini to‘xtatib qo‘ygan.
Muxolifat partiyasi noyabr oyida Armaniston bosh vaziri Rossiya va Ozarbayjon rahbarlari bilan Tog‘li Qorabog‘dagi harbiy harakatlarni to‘xtatish va mintaqadagi hududlarning bir qismini Ozarbayjonga topshirish haqidagi kelishuvni imzolaganidan buyon uning iste’fosini talab qilmoqda. Pashinyanning raqobatchilari fuqarolar unga bo‘ysunmaslik aksiyasini boshlaganini ma’lum qildi.
“Biz Pashinyanga iste’foga chiqishi uchun 8-dekabr soat 12:00 gacha vaqt berdik, biroq iste’fo berilmadi. Shu vaqtdan boshlab soat 17:00 gacha Armaniston fuqarolari bo‘ysunmaslik aksiyasiga chiqish huquqiga ega. Barchani qonun doirasida harakat qilishga chaqiramiz”, — deya ma’lum qilgan “Dashnaktsutyun” muxolifat partiyasi vakili Ishxan Sagatelyan.
U politsiya xodimlarini “Pashinyanning noqonuniy buyruqlariga” bo‘ysunmaslikka chaqirgan.
5-dekabr kuni bo‘lib o‘tgan namoyishda muxolifat Pashinyandan 8-dekabr kuni soat 12:00 gacha iste’foga chiqishni talab qilgan. Aks holda muxolifat butun Armaniston bo‘ylab bo‘ysunmaslik aksiyasini boshlashni va’da qilgan.
Eslatib o‘tamiz, 16-noyabr kuni Armaniston tashqi ishlar vaziri Zograb Mnatsakanyan iste’foga chiqqandi. Bungacha Pashinyan vazirni uning nazorati ostida ikki yil davom etgan muzokaralar jarayoni “hududlarni topshirishni qaytarib bo‘lmas darajaga olib kelganida” ayblagan.
20-noyabrda Armaniston hukumatining uch a’zosi — mudofaa vaziri David Tonoyan, mehnat vaziri Zarui Batoyan va favqulodda vaziyatlar vaziri Feliks Solakyan iste’foga chiqqandi.
Izoh (0)